پەڕەشووت

لە کتێبی:
ئاوێنە بچکۆلەکان
بەرهەمی:
شێرکۆ بێکەس (1940-2013)
 1 خولەک  336 بینین
منیش خەیاڵم فڕگەیە
منیش شیعرم فڕۆکەیە
منیش وشەی پەڕەشووتداری خۆم هەیە
«ڕەنگە پەڕەشووتەکانیان،
هەندێ جار فرمێسکی خۆم بن.
ڕەنگە پەڕەشووتەکانیان، زۆر جاری تر
گوڵونکەکانی کۆڵوانەی دایکی تۆ بن.
ڕەنگە پێڵووی منداڵانی «هەڵەبجەشوێن» بن.
ڕەنگە مەمکی کچەکانی «وەسانانشوێن» بن.
ڕەنگە کڵاو و جامانەی شەهیدان بن».
هەموو جارێ ئەیانبەمە
ژوور وڵاتی هەور و باران
خۆیان هەڵئەدەنە خوارێ و پەڕەشووتیان ئەکەنەوە
حەرف، حەرف ئەنیشنەوە.
هەموو جارێ وشەی پەڕەشووتداری من
عەردێکی نوێ
ئەستێرەی نوێ
لە گەردوونی هۆنراوەدا ئەدۆزنەوە!