گلەیی لە چەرخ
از کتاب:
شاخی هەورامان
اثر:
قانع (1898-1965)
1 دقیقه
819 مشاهده
سەیری کە! چەرخی کۆنە چلۆن شاڵ و جاو ئەکا
دوژمن بە ڕۆحی سێبەرە، مەیلی هەتاو ئەکا
مێ باز و مێ پەرستە موعینە بە ئیشی مێ
هاوڕەزمی شیری بێشەیە قەتڵی پیاو ئەکا
پیرە ژنێ وەهایە بە سەد مەکر و چابلووس
خۆ گیرە، خۆ فرۆشە، لە گشت کەس سڵاو ئەکا
بەم پیرییە چ مناڵە، لە بۆ ڕەنگی ئاڵ و واڵ
ڕەنگ ڕێژە کووپە کانی، لە قەلبی شکاو ئەکا
گاهێ سەری لە هیچەوە، ئەیداتێ تەخت و تاج
گاهێ سەری لە تاجەوە، بە تپڵی دڕاو ئەکا
بەڕی نییە لە شاخەدا جنگدارە وەک پڵنگ
بەحری نییە لە بەحرەدا ئیشی سەراو ئەکا
کەبابچییەکی چ شۆخە، بەڵام دڵ ئەدا لە سیخ!
قیمەی کەبابەکانی، لە جەرگی بڕاو ئەکا
دەوران وەکوو خەیاتە بە مقرازی هاتوچۆ
جلدووری چاکە کەواکەی لە لاشەی دڕاو ئەکا
قانعتخلص بە دەستی چەرخەوە وا مات و سەرکزە
بێ هێز و بێ تەکانە لە ماری کوژراو ئەکا