گلەیی لە چەرخ
لە کتێبی:
شاخی هەورامان
بەرهەمی:
قانع (1898-1965)
1 خولەک
521 بینین
سەیری کە! چەرخی کۆنە چلۆن شاڵ و جاو ئەکا
دوژمن بە ڕۆحی سێبەرە، مەیلی هەتاو ئەکا
مێ باز و مێ پەرستە موعینە بە ئیشی مێ
هاوڕەزمی شیری بێشەیە قەتڵی پیاو ئەکا
پیرە ژنێ وەهایە بە سەد مەکر و چابلووس
خۆ گیرە، خۆ فرۆشە، لە گشت کەس سڵاو ئەکا
بەم پیرییە چ مناڵە، لە بۆ ڕەنگی ئاڵ و واڵ
ڕەنگ ڕێژە کووپە کانی، لە قەلبی شکاو ئەکا
گاهێ سەری لە هیچەوە، ئەیداتێ تەخت و تاج
گاهێ سەری لە تاجەوە، بە تپڵی دڕاو ئەکا
بەڕی نییە لە شاخەدا جنگدارە وەک پڵنگ
بەحری نییە لە بەحرەدا ئیشی سەراو ئەکا
کەبابچییەکی چ شۆخە، بەڵام دڵ ئەدا لە سیخ!
قیمەی کەبابەکانی، لە جەرگی بڕاو ئەکا
دەوران وەکوو خەیاتە بە مقرازی هاتوچۆ
جلدووری چاکە کەواکەی لە لاشەی دڕاو ئەکا
قانعناسناوی ئەدەبی بە دەستی چەرخەوە وا مات و سەرکزە
بێ هێز و بێ تەکانە لە ماری کوژراو ئەکا