سەرتاش

ئەو کەژانە دەمێکە قژ ئەهێڵنەوە
ئەم هاوینە هێندە درێژ بووبوونەوە
لە وەختی سەماکردنا، لە عەرد ئەخشان!
ئەوا ئیستەیش، لە پەنجەرەی ئەم ژوورەوە
چاوم لێیە
پاییز بە پێوە وەستاوە و
وەک سەرتاشێکی ڕەقەڵەی پەنجە درێژ
خێرا خێرا بە مقەستی تیژی «کانوون»
پرچی زەردی کەژان ئەبڕێ
ناوبەناویش «با»ی شاگرد دێ و
بە خاولیەکەی لە پشتەوە
تووکەسەری پشت ملی کەژ ئەتەکێنێ و
ئەیانخاتە ئەو چەمەوە!