چ نەشئەیێکە دڵگوشا لەو ڕشتە کۆهسارەوە
از کتاب:
دیوانی زاری
اثر:
زاری (1905-1982)
5 دقیقه
438 مشاهده
چ نەشئەیێکە دڵگوشا لەو ڕشتە کۆهسارەوە
زهوور ئەکات و بێدڵان ئەخاتە سەد خومارەوە
دەمێ سەحەر ئەدا خەبەر لە ئەرکی شەهریارەوە
عەتری بەهەشتی پێیە با، کە دێ لە لالەزارەوە
موژدە بە بولبولان ئەدا لە لایەنی بەهارەوە
کە شێری ئەو حەریمە دەم دەمی فیوز باز ئەکا
خزر لە ئاوی زیندەگی بێزار و بێ نیاز ئەکا
بە شەوقی پڕ لە شەرمەوە بولبول کە عەرزی ڕاز ئەکا
سەبا بە دەستی بەندەگی یەخەی شکۆفە واز ئەکا
وەک ئافتاب دێتە دەر لە بورجی شاخسارەوە
چ ئاورێکە بەرئەبێ لە دڵ، لە سینە، جسم و گیان
ساقی کە دێتە بەزمەوە میسالی ماهی ئاسمان
سەدای ڕۆح پەروەری، قووەیە، قووتە بۆ ڕەوان
ناڵەی تەزەرو و قومریە، زینەت ئەخاتە گوڵستان
ئەڵێن بە جووت پێکەوە بە شەوقی بێ شمارەوە
بۆ دەفعی ئێشی زەخمی دڵ، ئەگەر جۆیای مەرهەمی
کەسبی سەفا و سەفوەتێ بکە لە پڕتەوی شەمی
زستانی هیجر باری کرد، بڕا لە باغی دڵ تەمی
هاتەوە دەوڵەتی گوڵ و زەمانی عەیش و بێ غەمی
تێکە بخۆ پیاڵەیێ بە دەنگی چەنگ و تارەوە
لە خوا بخوازە چاوەکەم ڕەفاقەتی شەکەر لەبێ
بێ بەزمی ئاسەفی زەمان هەتا بگەی بە مەتڵەبێ
ئاگا بە نەقدی عومر با لە دەس، بێهوودە دەرنەچێ
دوور ڕۆژە عەهدی گوڵ نەکا فرسەت بە کامی دڵ نەبێ
ساقی بە کووپە بێنە مەی پیاڵە هەر بشارەوە
هەرزانە موشتەری وەرە دیداری سەروی سیم بەر
لە بەزمی مەهوەشاندا ئەدەن بە گیان و ماڵ و سەر
سۆزە، گودازە، ناڵەیە هاوارە شیوەنە و چەمەر
ڕووبەندی سۆسەنی دڕی نەسیم و زوڵفی کەوتە دەر
ئاوری شەوقی خستە دڵ بولبولی بێقەرارەوە
لە ئاستانی نەرگسا عوموومی غونچەکانە جەم
وەنەوشە سەر فکەندە وەک لە ڕووی شاهدا خەدەم
پیاڵە نەشئە بەخشە بۆ نەجاتی دڵ لە بەحری غەم
لە ژاڵە تێبفکرە تۆ لە سەر گوڵانی سوبحدەم
میسالی قەترەیی عەرەق بە ڕوویی گوڵعوزارەوە
عەزیزی میسری خاترە لە گوڵشەنی حەبیبیا
مومتازی عەسری حازرە لە مەعدەنی نەجیبیا
کە ئەم مەسیحە هاتە دەر لە مەعهەدی تەبیبیا
بە ڕەنگ و بۆ و مەنزەرە، چەمەن لە دڵفریبیا
شێوەی بەهەشتی گرتووە لە هەوری موشکبارەوە
دیداری یارە حەجی من، چ حەج؟ حەجی ئەکبەرم
فەدای خاکی ڕێگەکەی گیان و ماڵ و هەم سەرم
گێسووی عەترسا ئەگەر وەدەر ئەخات دڵبەرم
خەتا، خەتا ئەکا بڵێ مەکانی موشکی ئەزفەرم
خەرمەنی موشک وا بەسەر شەهی کڵاو لارەوە
لە خۆرهەڵات و خۆرنشین، بۆ عاشقانی دڵ حەزین
هەر ئەمە مەرهەمی برین، «رضوانهعربی» هاتە سەرزەمین
لە دەور و پشتی مەنزڵی حەشرە، چ حەشر بێ ببین
سەفی گوڵانی نازەنین، خاتر فریب و مەهـ جەبین
سپی و سەوز و زەرد و شین بە چاوی پڕ خومارەوە
وەکوو دیاری ئەیمەنە دیارە نووری سەرمەدی
بە ئیتیفاقی ئەهلی دڵ لە دار و بەرد مەعبەدی
دوو نەهرە پاک و پڕ گوهەر لە بەحری خولقی ئەحمەدی
عەجەب جوانە هەڵکرا، بە نووری سونعی ئیزەدی
گوڵی هەنار وەک چرا بە سەر چڵی هەنارەوە
چناری باغی بەر سەرا، بە با کە هاتوچوون ئەکا
تەسبێحی زاتی ئەقدەسی خودای جوملە بوون ئەکا
هەوای زەڕڕە پەروەری، هەوای دڵ زەبوون ئەکا
مەگەر شیرینی ئەرمەنە، دیدەن لە بێستوون ئەکا
خەرام و نازی شۆڕەبی لە لێوی جۆیبارەوە
چ دڵڕوبایە تەلعەتی کە پەردە لائەدا لە ڕوو
کەمانی ئەبروان ئەدەن لە سینە تیر دوو بە دوو
حوسنی بەهاری چون ئەدا بە نەوبەهار ئابڕوو
سەبا ئەدا لەشاخی گوڵ، شکۆفە دێتە هاتوچوو
ڕەققاسی بەزمی بادەیە بە جامی زەڕنیگارەوە
چ ئیزدیحامە لەو دەرە، چ زەمزەمە، چ تەنتەنە
جۆشی بنۆشی بادەیە، هاوار دەف و دەفزەنە
جەژنی ویساڵی دۆستان بە کوێری چاوی دوژمنە
مەتاعی عیشوە باریە، عازمی شاری گوڵشەنە
قەتاری لالە هاتەوە لەدەشت و کۆهسارەوە
فیدای ڕووتم ئەی چرا لە ئێمە ڕوو مەشێرەوە
پابەندی گێسوانی عەنبەرینتم، لە دێرەوە
چ خۆشە دێ سەبا،سەحەر بە عەتری دڵپەزێرەوە
عەتاری یەسرەبی مەگەر عوبووری کرد لێرەوە
کە بێنی موشک دێ لە هەر دیار و هەر کەنارەوە
شوکری خودا کە لێرەدا گەییم بە ئارەزووی دڵ
کراوە دەرکی مەخزەنی عەتییە و شکا قوفڵ
بە بەرقی شەوقی ڕوومەتی، دەروونی سینە هاتە کوڵ
بازاڕی نازی غونچەیە و عەتر فرۆشەکانی گوڵ
لە هەر کەنار و باغەوە لە هەردی هەر دیارەوە
ئەمیری جینن و ئینس وەک خاوەنی بەیت موقەددەسە
پەروانەکان کۆوە بن لە دەوری شەمعی مەجلیسە
دڵێ غوڵامی گوڵ نەبێ گەدایە، ڕووتە، موفلیسە
فیدای خاکی گوڵشەنم کە خەیمەگاهی نەرگسە
جێگەی نزوولی ڕەحمەتە لە چاوی هۆشیارەوە
سەیری جەماڵی دڵبەر و ئەندامی ڕێک و خەندەکەی
مەغبوونی «زاریتخلص»، گەر بدەی بە موڵکی ئەسفەهان و ڕەی
بە گیانی پیری مەیکەدە بە زەوقی بادە، سۆزی نەی
هەوای یارە باعیسم بۆ نەزمی شێعر و بەزمی مەی
وەگەرنە من چ کارمە بە باسی گیا و دارەوە