دەردە دڵ لەلای یەزدان
از کتاب:
باخچەی کوردستان
اثر:
قانع (1898-1965)
1 دقیقه
760 مشاهده
خوا با بەس بێ دەرەلنگ دڕاو
بەس بێ موحتاجی بۆ نان و بۆ ئاو
چل و دوو ساڵە من دروست کراوم
ڕزقی ساڵێکی خەڵقت پێ نەداوم
دەست بڕیوم لە هەموو لایێ
بە هیچ کلووجێ تەسەلام نابێ
بۆ لای هەرکەسێ کە پەنا ئەبەم
داوای ڕبەیەک گاڵی لێ ئەکەم
ئەڵێ خەم مەخۆ خوا ڕەزاقە
پیاوی بێ باوەڕ مەعلووم فاسقە
تەواو لێم ئەگرێ ڕێگەی ڕووناکی
ئەمکا بە فاسق لەباتی چاکی
یا ئەڵێ هەرکەس کە دیانی داوە
مەعلووم کە دیانی بۆ نان داناوە
توخنی حیکمەتی خوا نەکەوی
سەری بێ ڕۆزی وا لەژێر زەوی
تۆ دیانت دامێ نانم پێ نەخوارد
هەموو هەڵوەرین بەهەناسەی سارد
نیم لە ژێر زەوی و ڕۆزیشم نییە
ئیتر شاردنەوەی فایدەی چییە؟
خوا با بەس بێ قسەی بێ سەمەر
وەعدەی من و تۆ، دیوانی مەحشەر