بە حەسرەت ئەشکی ئاڵم دێتە سەر ڕوو
از کتاب:
دیوانی سالم
اثر:
سالم (1800-1866)
1 دقیقه
710 مشاهده
بە حەسرەت ئەشکی ئاڵم دێتە سەر ڕوو
بەسەر ڕووتا کە ئیفشا بوو سەحەر موو
دەکا شیرین بە ئاشق گۆشەگیری
لە کونجی لەعلی لێوت خاڵی هیندوو
دەزانن خەرمەنی من بۆ گڕی بەست؟
بپرسن گەر لە یاری ئاتەشی خوو
لە کوێ بێنێ ئیشارەی چاوەکانت
ئەگەرچی مەستە وەک ئەو چاوی ئاهوو
بە مەرگی تۆ لەبەر تۆ شەو بە میحنەت
سەرم نابینێ بەستەر غەیری زانوو
دەناڵێنێ دڵی زارم وەکوو زیر
لە شاما شانە کەی گەر شامی گێسوو
عەجەب ئاسایشێکم دی لە هیجرت
لە خارا ڕەقترە بۆ من پەڕی قوو