ئارەزووی ئازیز وەنەم سەر داوە
از کتاب:
دیوانی مەولەوی
اثر:
مولوی (1806-1882)
1 دقیقه
1610 مشاهده
ئارەزووی ئازیز وەنەم سەر داوە
نە هەردەی دەروون ئایر وەرداوە
تاقەت بی وە هوون جە سەختیی زامان
تکتک چەنی هەرس ڕێزا وە دامان
خەم نە سەرجۆی هوون سارای دڵ جەم جەم
بارچنی چون فەوج قافڵەکەی عەجەم
هەر وە زۆر مەندەن نیم نەفەس باقی
وادەی دەورتەن، هانا هەی ساقی!
دەورێدەر وە ناز وە پیاڵەوە
ژەنگی دڵ وە جام مەی بماڵەوە
بۆی گوڵاڵەی دەرد دڵبەر عەزیزەن
مەزەی تامی خەم یاران لەزیزەن
فەریادڕەسیم کەر، نە جای گشت کەسم!
مازە ئەو لەزەت بەرشۆ نە دەسم
ئیحیام کەر وە جام سافی یەک مەنی
بەڵکوو بمانوون، پەی غەمێ هەنی