خواناسی
از کتاب:
دیوانی پیرەمێرد
اثر:
پیرمرد (1867-1950)
2 دقیقه
1008 مشاهده
ئەگەر خوات ناسی بپاڕێرەوە
بە زمانی خۆت بلاڵێرەوە
خوای گەورە و بزورگ پادشای بێ نیاز
بێ هاوبەش، بێ کەس، بێ شوێن، بێ هامڕاز
تێگەیشتنت دامێ تێت بگەم
پێم لێ نا هەر تۆی بێ زیاد و کەم
چاوم هەڵبڕی ئاسمانم دی
وتم: بێ وەستا نەهاتۆتە دی
ئەگەر کردەوەی بێگانە بوایە
خۆ ئەشیا بێ ستوون ڕانەوەستایە
دیارە هەر چەرخێک پیاو دروستی کا
کاتێکت زانی سوا و تێک شکا
چەرخی ماکینەی ئەم ڕۆژ و شەوە
بێ هەڵم و بەنزین ئەسووڕێتەوە
چەوری پێ ناوێ هیچ ژەنگ ناگرێ
لێک هەڵناوەشێ، دەستی تێ نابرێ
هەر لەو ڕۆژەوە کە تێک خراوە
هێشتا جەڕێکی لێ نەسواوە
هەر بەو پێوانە کە بۆت داناوە
وا دێت و دەچێ هیچ نەسواوە
بێ گوڕە و بڕە، بێ چرپە و بێ دەنگ
تێکڕا لە کاران یەک ڕەنگ، یەک ئاهەنگ
تۆ نەبوویتایە چۆن تێک ئەخرا
ئەمانە لە کوێ پێکەوە ئەنرا؟
چۆن چەرخی گەردوون بێ دەستی وەستا
لە کاردا ئەبوو هەتاکو ئێستا
ئاش بێ ئاش وەستا ناسووڕێتەوە
گا بێ هۆی جووتیار ناگەڕێتەوە
سەد هەزار هەزار ئەستێرەناسان
ئەودیو خیوەتیان نەدی بە ئاسان
منیش ئەگەڕێم کە تۆ بناسم
ناتدۆزمەوە کوێر و کەساسم
چاوێکم بەرێ تۆی پێ ببینم
«أرنیعربی» بێژنیم کردووە بیبینم
دەستم پێ گرتووە شەرمەندەم مەکە
بۆ بەخشین گوناهی زۆر و کەم یەکە
هەر کردەوەیەک لە من ڕوویداوە
لە پێش کردندا لای تۆ نووسراوە
کە لەو تەختەیەی لای تۆ نووسرابێ
کێ ڕێی دەکەوێ بڵی: وا نابێ!