ستەمکاری
از کتاب:
دیوانی پیرەمێرد
اثر:
پیرمرد (1867-1950)
2 دقیقه
913 مشاهده
هەور ئەگری بە کوڵ، گوڵ پێئەکەنێ
باوک و فرزەندی بێرەحم ئەنوێنێ
نێرگز بە بۆنەی چاوی مەستەوە
ئەژاکێ لە دەس دەستاودەستەوە
گوڵاڵە ئاڵای ئاڵ و واڵای خۆی
بووە بە لەکەی داخی دەروون بۆی
بەڕەزا ئەڕوێ لە پەنا هەردا
بای مەینەت سەری ئەدا بە بەردا
وەنەوشە شێوەی شینی شینی خۆی
بووە بە باری گەردنکەچیی بۆی
پیشۆک لە خاکا بە خاکساری
پەرێشان پرچە لەبەر هەژاری
خۆی لە ژێر خاکا ئەشارێتەوە
ژنەلادێیی ئەیدۆزێتەوە
هەڵەکۆک کە باو لە بەفر ئەسێنێ
بێڵەکان سەر و بنی دەردێنێ
شنگی شۆخ و شەنگ بە سنگێکی دار
سنگی ئەشکێنن ئەیخەنە بازاڕ
لاولاو کە بە شەو ئەگەشێتەوە
ڕۆژ ڕووی خۆی لە ڕۆژ ئەپێچێتەوە
مێخەک گەردنی هەڵئەقرتێنن
سنگ و بەرۆکی پێ ئەڕازێنن
گوڵ بەو جوانییە ئەیخەنە مەنجەڵ
جواناو ئەڕێژێ بە هەڵم و دووکەڵ
بە بۆنەی بۆنە وا ئەیخنکێنن
ئامانی نادەن هەڵیەپچورکێنن
چیمەن کە سەوزەی نەوخیزی ناوە
بە لەقەی فتبۆڵ پێپەست کراوە
ئەرخەوان پەنای بردە بەر مردوو
لەویشدا ئەیکەن بە داری مردوو
ئەمە ناو ئەنێن سەیرانی بەهار!!
منیش ئەڵێم: داد لە دەست ستەمکار!