نوشتن جواب نامه‌ی شهنشاه روح به شاه ضمیر
از کتاب:
کۆمەڵەی شیعری فەقێ قادری هەمەوەند
اثر:
فقی قادر هموند (1830-1890)
3 دقیقه
779 مشاهده
نامە بی تەمام، سوڵتان دا جەواب
تەحسین کەرد بەو شای ئافتاب نیقاب
نامەی خۆش ئەلقاب وەیتەور دا ڕەقەم
وروود ئەمرت قەلبم کەرد خوڕڕەم
هەم دڵ موفتەخیر گەرمیی مەیلتەن
هەم سەردارانم سەرتوفەیلتەن
ئەر مەیلت ئێدەن ئێمە کەی مەمنوون
بە وروود عەرزەم بێ سەبر و سکوون
پەی مودافەعەی لەعین شەڕڕار
وێت چەنی سوپا تەعجیل کەر نە کار
مەبادا بە مەکر مەفسەدەی لەعین
ڕەخنە بۆ جە کار سەرداران کین
چون ئەخ ئەرشەد نەو جا مەوجوودەن
وجوود ئێمە هەنی بێسوودەن
ئەر یاوای بەو جا بە ڕشتەی ئەفکار
پەیپەی ڕەوان کەر ڕۆژنامەی ئەخبار
ئەوسا ئەر ئامام بەو جا کەرد لزووم
حازرم نەو جا ئەر کەردی مەعلووم
تەمام بی تەستیر، تەمهیر بی فەرمان
چاپار ستانا، ڕاهی بی ڕەوان
نەبی ئارامش تا حین حزوور
تەقدیم بی بە شا نامەی سەر وە مۆر
واناشان نامەی شای ساحێب سەریر
ئەو شەو ڕاحەت بی سوڵتان زەمیر
سەحەر هۆرێزا جەمشید دارا
سان سیلسیلەش کێشا نە سەحرا
کێشان درەفشان مەحمەل بی قەتار
مەنزڵان تەی کەرد سوپای بێ شومار
جەبەل چون جەمەل جەی حەمل گران
چۆک دا بە زەمین ئاما بە ئەفغان
شێران جە بێشە، پڵنگان نە کۆ
فیرار بین نە بیم سوپای پڕ شکۆ
سەرتەوق سوپای سوڵتان زەمیر
سەر دا نە ئۆردووی سەردار وەزیر
هەردووشان چەنی سەرهەنگان کار
کەردنئیستیقبال شای والا تەبار
پیا بین جە ئەسپ پێش کەردن سجوود
کەردن حەمد و شوکر شەهەنشای مەعبوود
بۆسان ڕیکابش، سوار بین بە زین
کەردشان سەنای شای والا نگین
هەم سوڵتان بە لوتف گەرمی کەرد نە کار
هەردوو مەسروور کەرد بە شەهد گوفتار
سوڵتان نە خەیمەی وەزیر پیا بی
ئەسباب عوشرەت گشت موهەییا بی
هەردوو واقیعەی وێشان کەرد بەیان
هەم جە ڕەزمکین، جە سوود و زیان
چیهرە گوشاد کەرد شای والا نگین
تەسکین دا دڵەی سەرداران کین
سازان ئۆردووگاهـ سوپای بێ ئەندێش
هۆرێزا سوڵتان پەی خەیمەگای وێش
سوڵتان جە مەغریب سەلام دا بە تۆپ
جەواب دا سەلام ئەدا بی جەو سۆب
زولف شەو چیهرەی زەمین کەرد سیا
قەراوڵ بەرشی جە هەردوو سوپا
سەحەر هۆرێزا ئەممارەی لەعین
سوار بی چەنی سوپای سەهمگین
جەو تەرەف سوڵتان زەمیر بی سوار
یاساڵ دا قشوون حەربەی کارزار