nuştin cwab namey şihnişah ruḧ bih şah zimîr
From the Book:
Komele Şîrî Feqê Qadirî Hemewend
By:
Faqe ghader hamawand (1830-1890)
3 minutes
592 views
name bî temam, sułtan da cewab
teḧsîn kerd bew şay aftab nîqab
namey xoş elqab weytewr da řeqem
wirûd emirit qelbim kerd xuřřem
hem dił muftexîr germîy meylten
hem serdaranim sertufeylten
er meylit êden ême key memnûn
be wirûd ’erzem bê sebir û sikûn
pey mudafe’ey le’în şeřřar
wêt çenî supa te’cîl ker ne kar
mebada be mekir mefsedey le’în
řexne bo ce kar serdaran kîn
çun ex erşed new ca mewcûden
wicûd ême henî bêsûden
er yaway bew ca be řiştey efkar
peypey řewan ker řojnamey exbar
ewsa er amam bew ca kerd lizûm
ḧazirim new ca er kerdî me’lûm
temam bî testîr, temhîr bî ferman
çapar sitana, řahî bî řewan
nebî aramş ta ḧîn ḧizûr
teqdîm bî be şa namey ser we mor
wanaşan namey şay saḧêb serîr
ew şew řaḧet bî sułtan zemîr
seḧer horêza cemşîd dara
san sîlsîleş kêşa ne seḧra
kêşan direfşan meḧmel bî qetar
menziłan tey kerd supay bê şumar
cebel çun cemel cey ḧemil giran
çok da be zemîn ama be efẍan
şêran ce bêşe, piłingan ne ko
fîrar bîn ne bîm supay piř şiko
sertewq supay sułtan zemîr
ser da ne ordûy serdar wezîr
herdûşan çenî serhengan kar
kerdin’îstîqbal şay wala tebar
pya bîn ce esp pêş kerdin sicûd
kerdin ḧemd û şukir şehenşay me’bûd
bosan řîkabiş, swar bîn be zîn
kerdişan senay şay wala nigîn
hem sułtan be lutif germî kerd ne kar
herdû mesrûr kerd be şehd guftar
sułtan ne xeymey wezîr pya bî
esbab ’uşret gişt muheyya bî
herdû waqî’ey wêşan kerd beyan
hem ce řezmikîn, ce sûd û zyan
çîhre guşad kerd şay wala nigîn
teskîn da diłey serdaran kîn
sazan ordûgah supay bê endêş
horêza sułtan pey xeymegay wêş
sułtan ce meẍrîb selam da be top
cewab da selam eda bî cew sob
zulf şew çîhrey zemîn kerd sya
qerawił berşî ce herdû supa
seḧer horêza emmarey le’în
swar bî çenî supay sehmigîn
cew teref sułtan zemîr bî swar
yasał da qişûn ḧerbey karzar