بیقراری نمودن سلطان دل از درازی و دیجوری شب
از کتاب:
کۆمەڵەی شیعری فەقێ قادری هەمەوەند
اثر:
فقی قادر هموند (1830-1890)
2 دقیقه
700 مشاهده
چون سوڵتان دڵ مەحبووس بی نە کار
دنیا جە دیدەش پۆشا پەردەی کار
یەکشەو نیشتەبێ نە حوجرەی ماتەم
خەم بی خەیاڵش نە حەڵقەی ستەم
چون ئەسەد ئەسیر ڕەوق زەنجیر بی
زەدەی سەرپەنجەی کلک تەقدیر بی
گوڵگوونیی چیهرەش جە تەڵخی ئەو شەو
زەرد بی و نەبی زەرد چیهرەی شەو پەی ئەو
سەر دا جە سینەش غولغول خەیاڵ
ئەو شەو موتەووەل جەلای ئەو چون ساڵ
پۆشا پەردەی زەنگ ئەو شەو بە دەیجوور
شوعلەی کەواکیب بی بە دیدەی موور
خورووس غائیب کەرد ئەوقات تەکبیر
گوم بی ڕشتەی فیکر جە دیدەی تەقریر
هەفت پەردەی گەردوون سەواد بی بە نیل
غەڵەت کەرد ڕای گۆش سەوت ئیسرافیل
چیهرەی شەو ئەو شەو زوشت هەیکەل بی
چون توول ئەمەل من موتەووەل بی
سەما بی بە زاغ سەودایی زەغەن
زەمین غوول زەنگ، زەمان ئەهرەمەن
چون زەنگی نە قەهر شەو سەرئەفگەندە
چیهرەش پڕهەیبەت، دەهەن بێخەندە
نەمەند جە سەفحەی سەما ستارە
شێران جە هەیبەت زهرەش بی پارە
شاهـ جە عیجز حاڵ زوبان کەرد گوشاد
جە درازی شەو ئاما بە فەریاد
وات یا شەو دەیجوور یا عەلامەتەن
یا دنیا نە دوود سینەم زوڵمەتەن
یا ئیمشەو دۆزەخ دوودش کەرد عەیان
یا جیهان نە عەکس بەخت من سیان
یا سینەی سەما گوم کەردەن ئەنجوم
یا دیدەی بەختم شەفەق کەردەن گوم
چون ڕشتەی ئەفکار موتەووەل ئەو شەو
دیدەی شا ئەو شەو هەراسان جە خەو
وێنەی مەسرووعان شای عالی مەقام
گا زاریی بێشۆ، گا مات و سەرسام