bîqrarî nimudin siltan dil az dirazî û dîcurî şib
Li pirtûka:
Komele Şîrî Feqê Qadirî Hemewend
Berhema:
Feqê Qadrî Hemewend (1830-1890)
2 Xulek
878 Dîtin
çun sułtan dił meḧbûs bî ne kar
dinya ce dîdeş poşa perdey kar
yekşew nîştebê ne ḧucrey matem
xem bî xeyałş ne ḧełqey sitem
çun esed esîr řewq zencîr bî
zedey serpencey kilk teqdîr bî
gułgûnîy çîhreş ce tełxî ew şew
zerd bî û nebî zerd çîhrey şew pey ew
ser da ce sîneş ẍulẍul xeyał
ew şew mutewwel celay ew çun sał
poşa perdey zeng ew şew be deycûr
şu’ley kewakîb bî be dîdey mûr
xurûs ẍa’îb kerd ewqat tekbîr
gum bî řiştey fîkir ce dîdey teqrîr
hefit perdey gerdûn sewad bî be nîl
ẍełet kerd řay goş sewt îsrafîl
çîhrey şew ew şew zuşt heykel bî
çun tûl emel min mutewwel bî
sema bî be zaẍ sewdayî zeẍen
zemîn ẍûl zeng, zeman ehremen
çun zengî ne qehir şew ser’efgende
çîhreş piřheybet, dehen bêxende
nemend ce sefḧey sema sitare
şêran ce heybet zihreş bî pare
şah ce ’îciz ḧał zuban kerd guşad
ce dirazî şew ama be feryad
wat ya şew deycûr ya ’elameten
ya dinya ne dûd sînem zułmeten
ya îmşew dozex dûdiş kerd ’eyan
ya cîhan ne ’ekis bext min syan
ya sîney sema gum kerden encum
ya dîdey bextim şefeq kerden gum
çun řiştey efkar mutewwel ew şew
dîdey şa ew şew herasan ce xew
wêney mesrû’an şay ’alî meqam
ga zarîy bêşo, ga mat û sersam