مناجات مؤلف بار دوم
از کتاب:
کۆمەڵەی شیعری فەقێ قادری هەمەوەند
اثر:
فقی قادر هموند (1830-1890)
2 دقیقه
839 مشاهده
بە عیززەت وێت دانای دادگەر
سەر ئازادم کەر ڕۆز مەحشەر
جە وەزن میزان، حیساب و سیرات
عەفووم کەر بە لوتف جە هەر واقیعات
جە نەزع سوئال نەکیر و مونکەر
جە زەلالەی حەشر، سیرات و سەقەر
غەیر جە زات تۆ عەلیم دانا
نییەن جە دارەین مەلجەء و پەنا
ئەر تۆ نەپەرسی داد زەلیلان
کێ هەن زەلیلان جە لاش بلاڵان؟!
خوسووس من جە دەست تورکان ئەسیرم
غەیر جە زات تۆ نییەن دەستگیرم
مەئیووسم جە سیلک خوێش و بێگانە
پەنام دان بە تۆ زات یەگانە!
جە دوود دەوران سیان پەڵاسم
هەم جەی بەند میحنەت بکەر خەڵاسم
عەتا کەر تەوفیق خەللاق وەدوود!
باوەروون بە نەزم ئیقلیم وجوود!
بە ئەڵتاف وێت عەزیم سوبحان!
مەحفووز کەر زەمیر جە سەهو و نیسیان
هەرچی هەن مەزهەر جە لای زات تۆن
تەعریف ئەوساف مەقامات تۆن
ئیقلیم وجوود مەکەروون بەیان
بەڵ حیسسەمەند بان زومرەی غافڵان
هەم نیزاع ڕۆح نەفس ئەممارە
هەم کردەی ئیبلیس شووم پەتیارە
بە تەوفیق حەق حەییی لایەنام
پەرێ سامیعان بکەروون تەمام..
«فەقێتخلص» تۆ گونات نەدارۆ شومار
ئیقلیم وجوود باوەر بە ئەفکار