«تەگبیری سەعدان بەگی پیر»
از کتاب:
لاس و خەزاڵ (فیدایی)
اثر:
ملا کریم فیدایی (1928-1993)
3 دقیقه
495 مشاهده
لەو کۆڕەیەدا هەبوو پیاوێ
بۆ حورمەت و ڕێز، ئەو شیاوێ
چون بوو لە زەمانی ئەحمەدئاغا
مەجلیس نشینی ئەو وەتاغە
وەک پیرە هەیاس عاقڵ و ژیر
هەر ئەوبوو کلیلی قفڵی تەگبیر
ڕازێ کە هەبایە بەو دەگوترا
کارێ کە دەگەڵ نەبوو نەدەکرا
ئەو پیرەیە بیرەکەی وەهابوون
تێی بڕ نەدەکرد سەد فەلاتوون
گربوویەوە لاسە شۆڕە بەو خەو
سەعدان بەگە پیرە نێوەکەی بوو
بێ دەنگە لە ژووری بارەگایە
بوو ئەو بەگە ژیرە تا دوایە
فەرمووی بە لاس ئەی جوانە
ئایا هەمە من حەقی قسانە؟
دەی بیست کە لە لاس ئەو کەلامە
لەو پیری بەڕێز و ئیحتێرامە
وای داوە وەڵامی ئەو مرۆیە
سەر ڕشتەیی لاسە هەر بە تۆیە
ئەو پیرە کوتی خەزاڵە بە خوا
نایە بە شەڕ و هەرا و دەعوا
گەر لەشکر و هێزی بۆ بکێشی
وەبزانە دڵی لە تۆ کە دێشی
عاشیرەتی زۆری ئەو لە دەورەن
ئازاو نەترس و گەورە گەورەن
کاتێ کە لەوانە یەک هەرا کەن
کۆ دەبنەوە ئەو قەبووڵ ناکەن
کیژێ بە هەراو کێشە ببرێ
ئەو ئەتکە بە مەزنی وانە بکرێ
کە مرۆیە لە ئێمە ئەو بکووژن
نامووسی ئەتۆ دەچێ لە سەر ژن
هەر کەس کە ڕژاوە ئابڕوویی
وەک دێو و ئەجندە وایە خوویی
سەرشۆڕیە ڕێز و حورمەتی تۆ
بڕوا لە سەر ئەو کچەی بە فێڕۆ
کچ زۆرن و ئابڕوو کە بڕوا
نابێتەوە بۆ کەسێ لەوەو دوا
بە قسەم بکە تۆ بچۆ بە تەنیا
بتبێ بە خودایی گەوە هەویا
بووزوویەکی ڕەشبەڵەک لە بەرکە
تەپڵێکی قوتیلکە تۆ لە سەر کە
وەک ئەو کوڕە کوردە گەر شوانە
گشتی بکە بێنە جامەدانە
بێ بەستە بە گەڕگەڕ ئەو لە تەپلە
هەمبانە بە کۆڵ و پڕ لە خەپلە
هەڵکێشە لە قاچ و قول بە دەستوور
گورەویەکی پەنتکە موو و ئەستوور
ئەو جارە دەپێ کە یەک کە ڵاشە
بۆ ڕێگە کەڵاشی نەرمە باشە
گوچانێکی قەف زل و بڵاوە
هەڵبگرە لەوێول و بناوە
سیپاڵی بەرت بکەی کە چڵکن
جا تۆ لە گەورکدا دەبی ون
بەو جورە بپێوە شیوو وادی
وەک مەم کە دەڕۆیی بۆ مرادی
جارجارە بە دەنگی لۆرە لۆرە
تۆ فەرموو لە کەژ هەوایی هۆرە
تەگبەندە لە بن شتوومەکانت
چەسپی کە لە بەندەنی جوانت
پڕ بێ لە دراوو زێڕ و لیرە
هەر پووڵە دەبێتە دەستگیرە
تەنگانە کە ڕوو بدا دەرندو
بە پارەیە لاد چێ لە سەر تو
بەو جۆرە بچۆ نە وەک بە خانی
بۆ خزمەتی یار بۆ شوانی
جا ئەو دەمە کێ ئەتۆ دەناسی
با بچیەوە بەر دەمی هەیاسی
وەرزێکی لەوێ بە، بیدوێنە
سازی کە شەوێکی بیڕفێنە
ئاوا کە ملی نەدا بە قوربان
بخوازەوە ئەو لە باب و خزمان
ئەو جارە بە هەڵپەڕین و لۆغان
بێهێنەوە گوندی ناو پردان
ڕآزی کە بە تۆ نەبوو خەزاڵت
زوو ڕێکەوە بۆ سەراو ماڵت
کوا خەڵک دەزانێ گەر ئەتۆ چووی
بۆ خاکی گەورک و وا لەوێ بووی
وەک هەووەڵی هەیبەتت دەمێنی
دەکرێ کە بە پۆز سەر هەڵێنی