خۆشەویستی شێخ عەلائەدین
از کتاب:
دیوانی ئەمین ئوشنوویی
اثر:
امین اشنویی (1889-1954)
2 دقیقه
1030 مشاهده
ئەوەلی مانگی ڕەجەب بوو هاتمە خاکی خەلان
بۆ زیارەت مورشیدی خۆم شێخ عەلائەدین عەیان
خانەقا و تەکیەم کە دیتن نایەتە وەسف و بەیان
ڕۆژ و شەو، وەقت و سەعات پڕ بوون بە دائیم مێهمان
سەیید و مەولا و سۆفی دەستەدەستە هەر زەمان
دائیمە مەشغووڵی زیکر و خەتم و تەسبیح و سەلات
مەوعیزەی شەرعیی و فیکر و ڕابیتە و نەفی و سووبات
یا ئیلاهی تۆ بە حەققی زاتی فەخری کائینات
هەرچی مەنسووبن لە دونیا و لە عوقبا دەی نەجات
داییمەن پایەندە و عالی بکەی ئەو خانەدان
سایەیی شێخی لەسەر مە داییمە بێ موستەدام
فەیزی ئەنعامی لە بۆ مە ڕۆژ و شەو بێ بەردەوام
نان و خوانی هێندە زۆرە قەت بنی نایە تەمام
هەر بەوەی مەعلووم بزانن ئەی موریدی فیکرخام
ڕسقی غەیبێیە دەبارێ باتین و مەخفی و نەهان
دڵ وەکوو پەروانەیە عاشق بە دیداری چراغ
داییمەن بە دزی دەسووتی جەرگ و دڵ بۆی بوو بە داغ
شەو وەکوو پەروانەیە، ڕۆژێ وەکوو بولبول لە باغ
تالیبی دەرمانی لوقمانە تەنی زار و نەساغ
ئاگری عیشقێیە بەر بوویتە دڵی من بێ گومان
ساحێبی رشتە و کەمەندن خانەدانی شێخ کەماڵ
گەردنم کەوتە کەمەندی شێخ عەلائی شێخ جەلال
بۆ ویسالی ڕوویی گوڵ ئەی بولبولی شیرین مەقال
تاکوو دەمری وەک «ئەمینتخلص» داییم لە دونیایێ بناڵ
خۆشە ناڵەی عاشقان و زاری و ئاهـ و فیغان