لەئاهەنگا

تیشکی ڕووی تۆ ماچی کردم
لەهۆڵی ئاهەنگی نازا
بەرەو شانۆی چەندین چاوی
وەک تۆی بردم
خستمیە شەڕ لەگەڵ نیازا
لەجوولەی لێو، تێت گەیشتم
نامەت دەوێ
تا مەبەستی هەردووکمانی
تیا دەرکەوێ.
*
لەباتی نامەی پڕگومان
خۆم هاتمە لات...
بە پەنجەی خەم بە زەنگی مات
لەدەرگەم دا
لەدەرگەی زامی نەترسا
کە تۆم بینی
ڕزگارم بوو...
لە ژێر بارێکی زۆر قورسا
*
کە هاتمە لات...
بازێک بە سەرما نیشتەوە
بوومە سەرکردەی دەوڵەتی.. خۆشەویستیت
لەسەر تاخچەی هەر دوو مەمکی
کەس نەویستیت
لێ ی دانیشتم
بە ئامانجی گیان گەیشتم
(لە «ژین» لە ژمارە «٧٠» بڵاو کراوەتەوە)