بێهۆشبوونی سوڵتان ئیبراهیم و هاتنی نۆش ئافەرین بۆ ڕزگارکردنی
از کتاب:
سوڵتان ئیبراهیم و نۆشافەرین
اثر:
خانای قبادی (1704-1778)
3 دقیقه
709 مشاهده
مونشیی ئەی دەوران چەرخ لاجوەرد
سەرلەوح ئەی نامە جەدەلکاری کەرد
خانا ئەر تۆ فام نەفەرقت مەندەن
ڕشتەی غەم دەماغ شەوقت نەکەندەن
نیگا کەر نە کار زەمانەی کەچباز
چەنی کێ کەمەر بەستەن وە ئەمجاز
چەنی کێ پۆشان وێش وە بەقاوە
تا سەر چەنی هەم کێ شین بەراوە
پیاڵەش کەیلەن جە دانەی دووڕەنگ
یەکێ جە شەربەت یەک جە شەبڕەنگ
با بکەین تەعریف شای شیرین جەماڵ
شازادەی سەروەر ئاوەرد بە خەیاڵ
خەیلێ پەی دیدار ئەو یار جوویابی
چون بوڵبوڵ پەی گوڵ شێت و شەیدا بی
بەڵێ پەنج سەعات جە شەوگار ویەرد
زانا شازادە تەشریفش ناوەرد
کەفت نەگڕەی گەرم پەژارەی خەیاڵ
توول خەیاڵش ڕاگەی هەزار ساڵ
سەبووری و تاقەت جەلاش گورێزا
نەدیدە دەم دەم ئەسرین مەرێزا
واتش ئەی دایە مەحرەم ڕازم
دڵسۆز هام دەم ڕاز و نیازم
حەرفێ مەواچووم مەبۆ بشنەوی
باوەرە پەرێم بەرگ شەورەوی
دایە وە سەرگەرد ڕۆحم فیداتەن
نەی شەب دەیجوور ئیرادەی کۆتەن
واتش مەپەرسە کارم زەروورەن
کارم جە تەدبیر موسڵەحەت دوورەن
وات سەرگەردت بام زوڵف سیا زەنجیر
ئەر شا بزانۆ لێت مەبۆ دڵگیر
دەست بەرد بە ملوەن دانەی جەواهیر
لەعلی بەرئاوەرد چون شوعلەی ئاهیر
بەخشا بە دایە سەوڵ نازئەنداز
دایە زبان بەست ناما بە ئاواز
شای نۆش ئافەرین بەرگ شەو پۆشا
ئەو شەو جەیانە شەربەت نەنۆشا
شی وە باڵای بام بێ خۆف و ئەندێش
سەروەناز بەردش ڕەفیق چەنی وێش
وات ئەی نازەنین مەحرەم جانی
مەبۆ تۆ جەی بام تا سوبح بمانی
تا من بزانووم خەبەر جە یارم
ئیمشەو جە هیجران دڵ بێ قەرارم
کەمەند گرت بەدەست سەوڵ خەرامان
جە باڵای حەسار لوا بە دامان
کەفت نەکۆڵانان دەروون کەیل غەم
مەردێ سیاپۆش نەوجا دی وە چەم
مەیو بە ڕاوە دڵ بە جۆشەوە
بارێ سەنگین ها بە دۆشەوە
شیرین مەکەردش خەیاڵێ نەدڵ
بە خەیاڵ تەشویش لێش مەبی حاسڵ
ئەی شەخسە کێ بۆ نەی شەو دەیجوور
ئەی کوڵە چێشەن ئاوەردن جە دوور
عەزم کۆ دارۆ چێشش مەقامەن
با من بپەرسووم ئەو مەرد چێش نامەن
هیچ سەدا نەکەرد وێش یاونا پێش
جەو دەمدا بەنەرم خەبەر پەرسا لێش
وەزیر ئێد زانا ڕەفیقانش بی
تەن بەستەی کەمەر جە غوڵامان بی
واتش شازادە خەبەر زانان
غوڵامان ئیمداد بە لام کیانان
وات ئەی ڕەفیقان موژدە بۆ لێتان
موژدەی نیک فاڵ ئاما نە ڕێتان
موژدە بەر وەلای جەمع سەروەران
واچە کارسازی وێشان بکەران
سوڵتان ئیبراهیم گرتەنم نەدۆش
بەوێنەی بێ گیان کەردەنم بێ هۆش
نۆش ئافەرین دی گوفتار وەی تەرزە
سەر تا پای باڵاش ئاما بە لەرزە
دەست بەرد قەبزەی تیغ کێشا نە غەلاف
داش نەفەرق سەر شەقش کەرد تا ناف
غەڵتان بە زام فەرق وێیشەوە
ئەسڵا سەدایێ ناما پێشەوە
شیرین بە چابک مدارا نەکەرد
شازادە نەدۆش وەزیر بەر ئاوەرد
گرت بەدۆشەوە ڕوو کەرد بە یانە
فارێغ نەکەردش چەرخ زەمانە
ڕوو کەرد نە کووچە و کۆڵان و بازار
چل کەس کێشکچی پێش بی خەبەردار