bêhoşbûnî sułtan îbrahîm û hatnî noş aferîn bo řizgarkirdinî
From the Book:
Suɫtan Îbrahîm û Noşaferîn
By:
Khana Qubadi (1704-1778)
3 minutes
514 views
munşîy ey dewran çerx lacwerd
serlewḧ ey name cedelkarî kerd
xana er to fam neferqit menden
řiştey ẍem demaẍ şewqit nekenden
nîga ker ne kar zemaney keçbaz
çenî kê kemer besten we emcaz
çenî kê poşan wêş we beqawe
ta ser çenî hem kê şîn berawe
pyałeş keylen ce daney dûřeng
yekê ce şerbet yek ce şebřeng
ba bikeyn te’rîf şay şîrîn cemał
şazadey serwer awerd be xeyał
xeylê pey dîdar ew yar cûyabî
çun bułbuł pey guł şêt û şeyda bî
bełê penc se’at ce şewgar wiyerd
zana şazade teşrîfiş nawerd
kefit negřey germ pejarey xeyał
tûl xeyałş řagey hezar sał
sebûrî û taqet celaş gurêza
nedîde dem dem esrîn merêza
watiş ey daye meḧrem řazim
diłsoz ham dem řaz û nyazim
ḧerfê mewaçûm mebo bişnewî
bawere perêm berg şewrewî
daye we sergerd řoḧim fîdaten
ney şeb deycûr îradey koten
watiş meperse karim zerûren
karim ce tedbîr musłeḧet dûren
wat sergerdit bam zułf sya zencîr
er şa bizano lêt mebo diłgîr
dest berd be milwen daney cewahîr
le’lî ber’awerd çun şu’ley ahîr
bexşa be daye sewł naz’endaz
daye ziban best nama be awaz
şay noş aferîn berg şew poşa
ew şew ceyane şerbet nenoşa
şî we bałay bam bê xof û endêş
serwenaz berdiş řefîq çenî wêş
wat ey nazenîn meḧrem canî
mebo to cey bam ta subiḧ bimanî
ta min bizanûm xeber ce yarim
îmşew ce hîcran dił bê qerarim
kemend girt bedest sewł xeraman
ce bałay ḧesar lwa be daman
kefit nekołanan derûn keyl ẍem
merdê syapoş newca dî we çem
meyu be řawe dił be coşewe
barê sengîn ha be doşewe
şîrîn mekerdiş xeyałê nedił
be xeyał teşwîş lêş mebî ḧasił
ey şexse kê bo ney şew deycûr
ey kułe çêşen awerdin ce dûr
’ezim ko daro çêşiş meqamen
ba min bipersûm ew merd çêş namen
hîç seda nekerd wêş yawna pêş
cew demda benerim xeber persa lêş
wezîr êd zana řefîqanş bî
ten bestey kemer ce ẍułaman bî
watiş şazade xeber zanan
ẍułaman îmdad be lam kyanan
wat ey řefîqan mujde bo lêtan
mujdey nîk fał ama ne řêtan
mujde ber welay cem’ serweran
waçe karsazî wêşan bikeran
sułtan îbrahîm girtenim nedoş
bewêney bê gyan kerdenim bê hoş
noş aferîn dî guftar wey terze
ser ta pay bałaş ama be lerze
dest berd qebzey tîẍ kêşa ne ẍelaf
daş neferq ser şeqiş kerd ta naf
ẍełtan be zam ferq wêyşewe
esła sedayê nama pêşewe
şîrîn be çabik midara nekerd
şazade nedoş wezîr ber awerd
girt bedoşewe řû kerd be yane
farêẍ nekerdiş çerx zemane
řû kerd ne kûçe û kołan û bazar
çil kes kêşkiçî pêş bî xeberdar