hatnî şazade bolay noş aferîn û sereřê lê girtinî lelayen melîk miḧemedewe
From the Book:
Suɫtan Îbrahîm û Noşaferîn
By:
Khana Qubadi (1704-1778)
6 minutes
743 views
serafan dewr ḧekakan řaz
wey destûr byen ey saz û awaz
bikerîn te’rîf şazadey çalak
kuşendey şêran bewran bê bak
horêzan we pa çun herde caran
řûkerdin nebaẍ gułbaẍçey yaran
şay newcewanan çun şêr bêşe
ye guzergaş bî daym hemîşe
çenî xan miḧemed yaran hersêşan
řû kerdin benaw gułbaẍçey xezan
dîş ke çend nefer duzdane destûr
dyarin ce dûr ew şeb deycûr
yawan bew mekan kemîngay guzer
kemîn nişînan zanaşan xeber
şazade çun şêr ne’re ber’awerd
řûkerd neduzdan çun merdan merd
watiş ey duzdan şûm na bêkar
’ezmitan çêşen ney zułmat tar
dest da be şimşêr melîk şêr merd
perê şazade we tund hełmet berd
şazade coşa wêney şêr mest
taw da behêmet girtiş bend dest
têẍiş send cedest xiroşa be qar
daş nekelley ser ferq nabêkar
çwar enguşt biřî kefit neřûy zemîn
xełtan kerd nehûn çun şêr ẍurîn
çenî dû ẍułam keftin nerûy xak
keftin nexaşak hem xak nimnak
baqîy ẍułaman kerdişan heras
xeber berdişan pey şah elyas
horêzan aman şazadan yekser
elyas û yaran temam diławer
girtin dewradewr sułtan îbrahîm
teşney xunuşen giştişan daym
şazade dest berd be şimşêr tîz
wist nedlîşan řoz řestaxîz
dîş elyas ama qebzey tîẍ bedest
bişanu neferq şazadey sermest
ḧemłe berd perêş bewêney piłeng
şî benezdîkiş nemeydan ceng
bazû guşad kerd berdiş webała
danerûy ferqiş cezerbeş nała
elyas beyek zerb kefit ne řûy zemîn
behûn řengîn bî sertapay şîrîn
se’îd û mes’ûd herdû şazade
peřê ceng wêşan kerdin amade
her dû beyek bar coş awerdişan
perê şazade ḧemłe berdişan
şêr hunermend tîẍ kîn bedest
xiroşa betaw wêney şêr mest
herdûşan be tîẍ beden kerd xeste
çun murẍ tîjbał şabał şikeste
řestaxêz xêza nekûçe û guzer
ce sam şimşêr şêr diławer
meş’eldar meş’el girtebê be çeng
midra bê we pa ne meydan ceng
şêr ser’efraz bewr kîne kêş
betundî û çalak wêş yawna pêş
da ne gerdenş kefit zerb sehmigîn
meş’el nedestiş kefit nerûy zemîn
çiraẍ û meş’el xamoş bî ce dûr
tarîk peyda bî çun şeb deycûr
bew tewr zułmat bî kes kes nenasa
her ceng bî nebeyn we bî mwasa
çunke tarîk bî şazadey çalak
çenî řefîqan ne meydan bîn tak
kenaregîr bîn ce řaguzarê
girtişan newer goşe û kenarê
şazadan be daẍ syaset mendin
ḧerbe ne kapoł yekter meşendin
her êd mezanan bed’endêşanen
nezanan zerer bext wêşanen
wextê ke zanan me’lûm bî lêşan
wêşan mekerdin ceng çenî wêşan
kemter mende bê lêşan we pawe
fîrar bîn lwan şêran bedmawe
çenî ẍułaman uftade û xêzan
yawan be menził esrîn merêzan
gişt beden xeste zar û natewan
xatir perêşan bêzar bîn ce gyan
ḧekîman zam peyda kerdişan
pey micrûḧ zam şew awerdişan
xeber berdişan pey cehangîr şa
ce me’rekey ceng şakerdin aga
şazadan yekser mecrûḧ û xeste
yekser dest û pa beden şikeste
şa ḧeraret girt xeşimş xiroşa
wezîr tełeb kerd beheybet coşa
bişo be te’cîl ey danay ře’îs
bawere perêm elyas we meclîs
wezîr be ferman şay daraşnas
awerd we meclîs şazade elyas
ama be xizmet şay nigun bext
sucde berd lwa nîşt we ban text
şa persa elyas îne çi ẍewẍan
ne kûçe û bazař demişq hweydan
cewab da ey şa îmşew şazade
temam mest bîn ce mestîy bade
ce giřey şeřab ferqişan coşan
hîç nebîn we ḧał wêney bê hoşan
ce ḧał mestî badey keyf werdin
ce bê hoşîda ey kare kerdin
şa ke êd şineft hîç nebî we teng
xamoş bîn ne ceng şêran řoy ceng
şazadan yekser xatir perêşan
horêzan lwan be maway wêşan
elyas wat melîk erê bê maye
ye pey çî karman to kerdî zaye
melîk miḧemed xecałet kêşa
şî ne beḧir fîkir xeyał wêşa
wezîr ye zana ama be guftar
wat melîk miḧemed newey namdar
min nekerdî kar hoşyarim daym
mezanûn menził sułtan îbrahîm
înşeła emin we bî wesîle
mawerûm perêt we mekir û ḧîle
îmşew nexewda be dest beste
mawerûm perêt bezarî û xeste
melîk wat wezîr er îne kerî
be dest beste perêm bawerî
sewgendim bezat padşay qedîm
merderût pene tac û text wîm
wezîr sebirş kerd ta yawa be şam
dimay şam xêza esbab best temam
şeb deycûr bî tarîk bî temam
berg şewrengî poşa be endam
lwa we bê deng ne pay kûçey şar
ta şî be menził şêr namdar
şî be metbex wêş kerdiş penhan
kes pêş nezana mel’ûn xeyan
nîga kerd te’am ḧazir kerdebên
be ’ezim xurden dest neberdebên
ḧemîd melaḧ newey namdar
ab mekerd be dest şazadey salar
nîyen ce metbex dayerulbeşer
hîç kes ce metbex nedaro xeber
tek da be te’am wezîr dana
darûy bê hoşî ne te’am şana
ne cagey tarîk wêş penhan bikerd
ser’encam wêş be qeza siperd
şazade û yaran te’am diłkêş
îştîha kerdin awirdin we pêş
dest kêşan werdin te’aman bekam
dersat hersêşan bê hoş bîn temam
nîga kerd cedûr wezîr napak
yaran bê hoşin keften ne řûy xak
kemendiş awerd ce xeyatey xam
şazade pêça ser ta pa temam
girt bedoşewe şazadey diłřêş
řûkerd nedma pey menziłgay wêş
sa ba şazade bimano ne doş
bişîn be serwext nazdar lał poş