wituwêjkirdinî melîk miḧemed legeł wezîrda
From the Book:
Suɫtan Îbrahîm û Noşaferîn
By:
Khana Qubadi (1704-1778)
6 minutes
550 views
goş biden bedastan piř ne cefa û derd
kê be dam sext mubteła nekerd
kê newist ne gêc mehlekey helak
sîney kê we têẍ cefa nekerd çak
melîk miḧemed nam şazadey guzîn
şêr şêrangîr çun bewr ẍuřîn
ewîş ke ’aşiq noş aferîn yiwarêd
wey mekan wey serzemîn bîd
daym derdedar cederd û daẍiş
ḧesret mend be şewq behar baẍiş
yek wezîrê daşt dana û hoşyar
ce ḧał řazan dewran xeberdar
watiş ey wezîr cay ’eqił û hoşim
mizanî min mat derûn piř coşim
îne çend wexten mułk û mał û şar
be ca guzaştim pey şox diłdar
neşar demişq goşenşîn bîm
ẍerîb wiłat ey serzemîn bîm
min amam nazdar be zor bwerûm
be arezûy dił nîkaḧiş kerûm
îse ha demişq piř ceşêr neř
ejder ejderan ejdehay ejder
çend ’aşiq temam nepay text zer
şêr şêrangîr bewran xûn xwer
îse mezanûm cerûy řojgar
zor min ney ca nimeyom bekar
îradem êden ce tedbîr kar
bişom be xizmet mah cefakar
teşrîf meberûm min we xak paş
şerḧ îstid’am me’lûm kem celaş
nam û nîşan wêm temam temam
’erz kerûm celay şox cemîn cam
bełku meyl kero be derbar min
derman kero derd dił bîmar min
ne saz meclîs seru endamş
binoşim şerbet şîrîn ne camş
wezîr wat ey şa serim neřaten
serim ha neřat herç řezaten
şay noş aferîn yek lence daro
hezar kes perêş erwaḧ mesparo
çend kes şazade îqlîmat nişîn
nepayey qesirş keften matemîn
ye kul wetemay noş aferînen
neşar demişq matem nişînen
şay şîrîn xałan dił bê endêşen
bestey nîkaḧiş be destî wêşen
îse erto meyl ey kare pêten
horêze bişo perwa ce kêten
bişo we menził mekan dułber
bedîdar yar seru nazperwer
guftar řazit yekser ker temam
wa çe ne xizmet şox cemîn cam
heta metawî wemhîrebanî
ne pay text zeř be canfişanî
mebo cewdemda hoşt bewêt bo
fîkirit we guftar, kirdar wêt bo
melîk wat wezîr tenha bê yawer
tenha çon bişûm weqesir diłber
bełkim nerûy řah ẍułaman şah
byawan bemin ce řay guzergah
çêş waçûm cwaw ’uzir lwanim
çon mesmû’ bibo řaz zubanim
ferda byawo ey xeber we şah
çun mebo saman ’uzir ey gunah
wezîr wat erto xeyałit pewsen
xatirit bey tewr piř ce weswesen
ey lîbas û berg ce wêt řeha ker
bewêney zengî řûy wît sya ker
syapoşî ker ce ser ta daman
binmanî ce şikil çeşin ẍułaman
tedbîr wezîr bexatir awerd
wêney zengyan lîbas sya kerd
poşa weqamet berg ẍułaman
be’ezim dîdar sewł xeraman
lwa tapay der be heway diłdar
midra ne pay qesir guzergay ḧesar
destey kemend gird cexeyatey xam
hewada nedewr gîr awerd nebam
wêş pêça ne ḧełq seririştey kemend
lwa beser bam şêr dił pesend
hem ne bałay bam lwa bedaman
řû kerd bemaway seru xeraman
yawa be ew baẍ guł ce hezar terz
pay sehî serwan çinaran berz
dîş nepay dirext mabeyn baẍan
zemzemey sazan şewq çiraẍan
nerim nerim be endek şî benzawiş
tayawa we pay serçeşmey awiş
şî tek da wedar mîxek û mirwar
nîga kerd nerûy meclîs diłdar
dułber nerûy text beẍemzebazî
çenî cewanê be’îşwe sazî
nîşten hem zanû mest mezey mey
bade menoşa peyapey pey pey
gahî dest meberd pey yeqey cameş
ga megirt bedest top şemameş
gahê mebosa le’il lebanş
ga dest memała xał û zułfanş
dem menya nedurc ḧuqey nebatiş
ga menoşa ab çeşmey ḧeyatiş
kenîzan besaz neway mosîqar
seday noşanoş berzen cegułzar
mutrîban besaz aheng şadî
mewanan meqam mubarek badî
xeyał kerd nedił îne yanî çêş
kê bo ey cewan bê xof û endêş
nîşten hem zanû dulber be gustax
menoşo bade be zewq û demaẍ
hîç bakiş nîyen ceşay kemer lał
efşar mekerd şemaman kał
min şazadanim yekayek dîyen
ey cewan newtûł şazade nîyen
her ney fîkir bî mesoza besoz
ta şeb deycûr nizîk bî beroz
meclîs hor girdin çiraẍ bî xamoş
horgirdin esbab cam noşanoş
şazade řû kerd menziłgay wêş
bê fîkir û xeyał bê xof û endêş
melîk miḧemed matem û zewîr
be matem naga yawa be wezîr
herç netoy baẍ dîyenş we çem
î’lam kerd celay wezîr piřẍem
mwatiş besoz her zarî mekerd
peyapey peywest xak beser mekerd
wezîr wat ey şa cûyay diłdarî
faydeş nîyen ey xakesarî
mebo ew şexse fanî keyn bey tewr
hîç kes nawero namş nerûy dewr
ceguzergay ew wêt biker penhan
pare ker betîẍ mewday bê eman
cew dima nazdar pey to memano
ser’encam kar ełbet mezano
qibûł kerd tedbîr wezîr kamił
be’ezim de’wa kemer best bedił
çend ce ẍułaman çabik guzîn kerd
muheya temam çenî wêş awerd
bełê cey werter şazadan yekser
nepay text şa neser kursîy zer
girdîn siperdey şah elyas bî
elyas bałades şahan şinas bî
şazadan yekser şêran bê bak
ne meclîs elyas mewerdin xorak
melîk miḧemed dił neheras bî
mêhman beseray şah elyas bî
meclîs nyaşan temam werdişan
yaran noş badey temam kerdişan
melîk miḧemed horîza bederd
îradey lwan kemîn sazî kerd
elyas persa lêş ’ezim kidarî
me’lûmen ’aciz dił bê qerarî
watiş fîdat bam ’aczîm çêşen
xeyałim xawen dîdem xew pêşen
ce elyas der dem hîmet xwahî kerd
ama we bîrûn dił piř dax û derd
çenî ẍułaman pesend kerdey wêş
horêzan lwan nepey kar wêş
nepay qesir zeř şîn yek cahê
wêşan da penhan ne guzergahê