ئەی خودا
از کتاب:
شاری دڵ
اثر:
سید کامل امامی (1903-1989)
1 دقیقه
986 مشاهده
دەمکوژی بەم دەردەوە یا چارەیی دەردم دەکەی؟
ئەی خودا هەر هەڵوەدا و موحتاجی نامەردم دەکەی؟!
هەروەکوو جاران لە سەر تەختی مرادم دادەنێی؟
یا نە، شووم و ماڵ خراپ وەک کوندی سەر بەردم دەکەی؟
دەمکەیە مەجنوونی عالەم، دڵ بە دەست دێنم؟ وە یا
عاشقی ڕوخساری لەیلا، وێڵی هەر هەردم دەکەی؟
من بە دڵگەرمی لەمەولا دەچمە نێو گوڵزاری عیشق
یا نە، مەحڕوومم لە گوڵشەن، مات و دڵسەردم دەکەی؟
ئەی خودا! جاران بە لوتفت هیچ خەم و دەردم نەبوو
ئێستە بێ لوتفی، کە تووشی سەد خەم و دەردم دەکەی
زوو لە نێو خۆشبەختەکان تاقانە بووم و بێ نیاز
ئێستە لای پەژموردەکانی دڵبەخەم، فەردم دەکەی