یاران دێوانە
از کتاب:
دیوانی سەیدی
اثر:
صیدی (1785-1849)
3 دقیقه
935 مشاهده
یاران دێوانە، یاران دێوانە
ئەبلەە کەسێوەن شێت و دێوانە
چی دونیای فانی بسازۆ یانە
بە ئاوایش وانۆ ماوای وێرانە
دونیا مەنزڵێن وێرانە، فانی
یانەش نەدان ساز کەس جە وێرانی
یاران هەر مەسکەن وێرانە زێد بۆ
ئەبلەهـ ئەو کەسەن بەوش ئومێد بۆ
هەرکەس عاقڵ بۆ چەنەش چی نیشۆ؟
ڕەنجی بێ حاسڵ پەی دونیای کێشۆ
هەر ئێد خاستەرەن بگنۆ نەڕای
تا یاوۆ وەلای ئەبەد ماوای
عاقڵانی دەور قەدیم ئەیامان
یانەی دونیاشان وێنەی «پُل» فامان
هەرچەند بمانی نەو ڕاگوزەردا
حاسڵش ئێدەن، بشیش وە سەردا
ئەر کەسێو نەبۆ وێڵ و دێوانە
وەبانی پولدا کەی کەردەن یانە
دونیا شارێوەن چوون قەدیم شاران
ساکنەن تێشدا هەزار هەزاران
وەلێ کەس جاوید چەنەش نەمەندەن
هەر پەنج ڕۆ کەسێو چاگەنە بەندەن
نە ئارامێ هەن، نە هۆو قەرارێ
جەی شار بەرمەشان هەررٌو هەزارێ
مەویەران بە جەخت یاران بە «پُل»دا
گشت مەبان پێوار جە خاک و خۆڵدا
پەیاپەی مەشان یاران بەو ڕاوە
یەکێ نمارۆ سەر بە دماوە
عەقڵی تۆ پێسەن ئی دونیای فانی
کەس تێش نەمەندەن، تۆ چەنەش مانی
مەشغوڵ بە کاو گڵ، یانە مەسازی
سەفەرێ سەختەن، دوورو درازی
شێتا فیکرو تۆ، خەیاڵت پووچەن
خەیاڵ هەر سەفەر کارسازی کۆچەن
وەس لیباسی شوغڵ دونیایی پۆشە
ڕای سەفەر دوورەن، پەیدا کەر تۆشە
گا نە فیکری حیرس جەمعی ماڵەنی
گاهـ پەرێ مەنسەب نە خەیاڵەنی
گاهـ چەنی فورزەند شادی و زەوقتەن
گاهـ پەرێ دیدار یاران شەوقتەن
کەللەی سەر جە کار دونیا کەر خاڵی
کاتێ مەزانی شادی بەتاڵی
ئەوسا مەزانی ئەجەل تۆش دا گیر
پاش نیای نە دام سیلسیلە و زەنجیر
دەروون پوڕ حەسرەت، خاتر پەرێشان
دوور کەفتی جە ئەهل، جە قەوم و خوێشان
نە ماڵ نە فورزەند، ناما بە کارت
تۆ مەندی نە قەبر کۆی عوسیان بارت
ئەوسا جەو دما، واحەسرەتا بۆ
تا یاگەی نیشتەی، نە بەرئامات بۆ
کەردەی زشتی وێت وەنەت بی دوچار
یا واردیش چوون وەرگ، یا گەستیش چوون مار
گیرۆدەی کردار فیعلی زوشتی وێت
بێ تۆشە و بێ زاد، خاڵی موشتی وێت
«عاصی»و ڕو سیا، گوناهکاری وێت
گورفتار قەبر تەنگ و تاری وێت
غەرقی گێجی بەحر سیاسەتی وێت
شەرمەندە و ڕوو زەرد قیامەتی وێت
«یا غافِر الذَّنب» سڕ پۆشی «سەتتار»
بویەر جە جورمی سەیدیتخلص خەتا کار