عەجەب سیڕڕێکە بۆچ بولبول خەریکی ناڵەیی زارە
از کتاب:
دیوانی ئەحمەد موختار جاف
اثر:
احمد مختار جاف (1896-1935)
1 دقیقه
920 مشاهده
عەجەب سیڕڕێکە بۆچ بولبول خەریکی ناڵەیی زارە
کەچی مەحڕوومە ئەو دایم ڕەفیقی غونچە هەر خارە
لە هەر وەقتێکدا نێرگس ببینم چەند لەلام خۆشە
کە چونکە ئەو گوڵەیش نەختێ شەبیهی چاوی دڵدارە
هیلالی یەکشەوەم دی سوجدەبەر بووم بێ تەئەممول من
موبارەک بوو لەلام چونکە ئەڵێی تاقی برۆی یارە
لە خەڵوەتخانەیی دڵما بەغەیرەز یادی تۆ جانا
نییە باوەڕ بفەرموو چونکە جێی یارە نە ئەغیارە
لە سیححەت دائیمەن بێزارم و مایل بە بیماریم
لە ڕۆژێکۆ کە دیومە غەمزەیی ئەو چاوە بیمارە
مەکە مەنعم لە عیشقی گوڵ ڕوخان زاهید دەخیلت بم
بە دەستی من نییە چی بکەم دڵی بێچارە ناچارە