غرووری کەوتە سەر ئەسفەندیار
از کتاب:
پەندەکانی پیرەمێرد
اثر:
پیرمرد (1867-1950)
2 دقیقه
1086 مشاهده
غرووری کەوتە سەر ئەسفەندیار
تیری ڕۆستەمی زوو بۆ کەوتە کار
لە پێشدا زۆری لێ پاڕایەوە
ئاوڕی خێری لێ نەدایەوە!
ئەیگوت من لەشم لە تونج کراوە
ترسم لە گورزی ڕۆستەم نەماوە!
تیرێ هات و دای لە ناوی چاوی
چەماندیەوە قەدی لاولاوی
ڕۆستەم پێی گوت کوا ڕۆبین تەنیەکەت
ئاوازە و لاف و گەزاف ژەنیەکەت
کێ وتی: دەستی ڕۆستەم ببەستە
چەرخ لە ژێر دەستی ڕۆستەم دا پەستە
ئەسفەندیاریش هێند هاتە زمان
چەپ گەردە چەرخی بێوەفای زەمان!
سەد هەزارانی وێنەی منی کوشت
گاهێ پشت بە زین، گاهێ زین بە پشت
مەگەر شانامە بە کەیف بخوێنن
نابێ پەندێکی وای لێ دەربێنن
ئەگەر هەر پەندێ پەندێکمان باتێ
ئێمەیش ئەچینە ڕێزەی وڵاتێ
بەڵام هەر ئەزین وا هەڵدەبەزین
گوڕە گوڕمانە تا دێینە بەر زین
بە حوشتریان گوت ملت دریژە
وتی: ئەڕوانم ڕێ سەرەولێژە
لێرە ئەوکەسەی کاریان پێ سپارد
مڵۆزمێکە بۆ هەناسە سارد
هەر خۆی ئاغا بێ و ژنی ئاغاژن
لەگەڵ برایا بیکە بە دوژمن
لە ئاغایەتیش کە هاتو لێکەوت
خۆی ئەکوتێتە میحرابی مزگەوت
بۆ ئەو کەسانەی شەرمیش نامێنێ
دوژمنیشی بێ هەر ئەیدوێنێ
لە ناو چاوایە تنۆکی حەیا
کە لەگەڵ تکا، ڕابورد، وا تکا
چوار یاری یەک ڕەنگ مۆدەی نەماوە
ئێستا دووڕەنگی لە ناوا باوە
ڕۆژێکمان لێ دێ بگەینە بوار
ناچار دەرکەوێ ڕەنگی ژێر شەڵوار
کەس واتەی چاکە ناگێڕێتەوە
غەیبەتیش لای کەس ناشێررێتەوە