لە ڕووی جیهاندا، تۆ وەرە پاک بە
از کتاب:
پەندەکانی پیرەمێرد
اثر:
پیرمرد (1867-1950)
1 دقیقه
3162 مشاهده
لە ڕووی جیهاندا، تۆ وەرە پاک بە
ئەوسا لە واتەی خەڵکی بێباک بە
هیچ کەس لە واتەی خەڵک ڕزگار نابێ
پیاوی قین لە زگ، قەت بە یار نابێ
بە هیوای هاوسێ، بێ چێشت ئەمێنی
چاوەڕێی دەست بی، هەر خەو ئەبینی.
چاو مەبڕەرە دەست، خراپ فێر ئەبی
بە پارووی خەڵکی، درەنگ تێر ئەبی!
کە قەلبی «ئیقباڵ» لابقائییە
بە کەم هەڵکردن، پادشاییە
تا خۆت دۆست نەبی، کەس نابێ بە کەس
چەپڵە لێ نادرێ، بە تەنها یەک دەس.
بۆ دۆستت چاکە، غەیر بێئەنجامە
ماڵ ڕاوەستابێ، مزگەوت حەرامە
بۆ دونیا دەبێ دەست بدەیتە دەست
هیچ کەسێ، هیچ کەس ناباتە بەهەشت
دەوران دەوڵەتت لە دەست دەسێنێ
بەڵام ناوی چاک تا سەر دەمێنێ
نییەتت چاک بێ، ئیش دەبەیتە سەر
درەخت «زڕ» نەبێ، هەر بۆت دێتە بەر