زەمین و زەمان کەونەین و مەکان
از کتاب:
دیوانی شاهۆ
اثر:
شاهو (1882-1971)
2 دقیقه
856 مشاهده
زەمین و زەمان، کەونەین و مەکان
جوز تۆ حاڵ و کێن؟؟ پادشای سوبحان
گەر بە کردەوەو وێم بدەری جەزام
مشێو تا ئەبەد، تۆ بدەی سزام
بەڵام ڕەحمو تۆ، یەکجار زیادەن
گوناو من جەلای «عەفووت» بەر بادەن
سا تۆیش بە کەرەم بکەرە چارەم
غەریب و بێکەس، یەکجار بێ چارەم
دەسگیرم نیەن غەیر جە لوتفی وێت
دەسگیریم بکەر، تۆ بیو لوتفی وێت
«مفرض» وەزیش کەردەن وەدەسگیر
«کۆسەو ویش» کەردەن وەیاگەی تەدبیر
پشت و وێش بەستەن بە هێزی «یاسین»
جە چەپ و جە ڕاس مەکەرۆ تەفتین
تەکلیفش کەردەن بڕیەنشا، ڕزقم
بماڕان وە سەنگ مڵامەت فەرقم
مەواچۆ منم: «معطی و مانع»
وێمەنا «مذل، معزو، رافع»
منیش پەناهم وەتۆ ئاوەردەن
دۆستتانی تۆم، وە شەفیع کەردەن
بەو باری گوناه، شەرمەسارەوە
بەو دیدەی نەمین، ئەشک بارەوە
بەو هەناسەی سەرد لێو بە بارەوە
بەو دڵەی، خەمگین خەفەت بارەوە
ئیلتیجام وەڕەحم «رحیم» ئاوەردەن
پەنام وە قاپی کەریم، ئاوەردەن
یەقین مەزانوو وە تەسدیقی دڵ
هەر تۆنی کەری مرادی حاسڵ
غەیر تۆ، کەس نیەن «معطی و مانع»
غەیر جەوێت نیەن «خسار» یا «نافع»
وێتەنی «معز، مذل، و ڕەززاق»
وێتەنی «کەریم، ڕەحیم وە خەللاق»
لا مانع لما اعطیت احد
لامعطی لما منعت ابد
ئومێدم ئێدەن مەولای بێکەسان
جەی غەریبیدا نەکەریم حەیران
ئاگەداریم کەر جە شەڕی دوژمن
پارێزەم جە مەکر مەککاری پڕ فەن
«مراد حاسڵ کەر» حاسڵ کەر «مراد»
چی بەندی غەمدا بکەرەم ئازاد
بە سڵامەتی، بێ دەرد و ئاسیب
سەر بەرز و دڵ وەش پڕ بار و نەسیب
بیاونی مەوە، وەلای قەومی وێم
نەوعێ کەر «دوژمەن» حەسەد بەروپێم
حسب الامری وێت دۆعام کەرد وەلات
«استجب لنا، قاضی الحاجات»
وەعدەی ئیجابەیش، وێت دان وە ڕەسووڵ
دیسان سا دۆعام بکەرە قەبووڵ
پەناش هەر وەتۆن شەهەنشای بێچوون
«حەسەنی بێکەس» خەمبار و مەحزوون
فەریاد ڕەسیش کەر کەسی بێکەسان
باچینەی زیاتەر، نەبۆ «سەرگەردان»