ڕەحمەتییەکە فەرهەنگێکی هەبوو لەو...
ڕەحمەتییەکە فەرهەنگێکی هەبوو، لەو فەرهەنگەیا گەلێ شتی باس کردبوو، ڕشتەی مرواری قەیدی چییە باسی هەندێکی بکا، خۆ قوفڵی کەعبە کەچ نابێ، ئەفەرمووێ:
«قران النحسین»: ئەوەیە کە دوو سەرخۆشی ڕیشدار ماچی یەکتر بکەن.
«عەربەدە»: نوێژێکە لە گۆڕی سەر خۆشانا بکرێ.
«پاڵەوان»: ئاقڵێکە لە ناو سەرخۆشانا دابنیشێ.
«بەرات»: ئەوەیە کە لە وەختی سەرخۆشیدا وەعدی پێی بدا، بەڵام کە هاتەوە هۆش خۆی نەیدا و پەشیمان ببێتەوە.
«فزووڵی»: ئەو کەسەیە کە لای دامە و تاوڵە دانێی و یەکێ لە دوو کەسەکە فێر ئەکا.
«زولقەرنەین»: ئەوەیە کە دوو ژنی هەبێ.
«مودەبیر»: ئەو کەسەیە کە مەساریفی لە دەرامەتی زیاتر بێ.
«ڕیش»: تەزبێحی دەستی ئەو کەسانەیە، کە ئەچنە دەرباری فیکرەوە.
«ڕووڕەش»: ئەو کەسەیە کە یەکەمجار تووشی یارەکەی ئەبێ و حەیتەکەی لووت بەرز ناکاتەوە.
«ماڵوێران»: ئەو کەسەیە کە ژنی دەستەمۆی لە ماڵا هەبێ.
«بازاڕی»: وەستای جنێو.
«هۆنەر»: قسەدز.
«موعجزە»: ئەو کەسەیە کە لە لای دامە و شەترەنج و شت دائەنیشێ، ڕاستیەکەی ئەزانێ نایڵێ.
«ئەلتقاوالساکنین»: دوو فەقێن لە حوجرەیەکدا.
«ڕەمەزان»: بەهیوای بەهەشت چوونە ناو جەحەنەمەوە.
«سوێن»: پێخۆری درۆ.
«عەزرەفوت»: ئەو کەسەیە شعری خۆی ئەخوێنێتەوە سەری بۆ ئەلەقێنێ.
«ڕاستگۆ»: دووژمنی هەموو کەس.
«بێ گوناح»: ئەو کەسەیە، کە کەوتبێتە ژێر دەستی سەرتاشی ناشیەوە.
«نادر»: ژنێکە کە قسەی بە ڕێ و جێ بکا.
«بەدبەخت»: جوانێکە کە ژنی پیری هەبێ.
«پێوڵەت»: پیرێکە کە ژنی جوانی هەبێ.
«زەبانیە»: سەرتاشی ڕیشدار.
«زەقووم»: ئەو پارەیەیە کە ئەیدەیتێ.
«مەلا»: عزرائیلی مناڵان.
«دیق و دەرد»: هاوڕێی خراپ.
«بەرگدووری چاک»: ئەو بەرگدوورەیە کەجلەکان ئەندازە نەروێت.
«تەوقی لەعنەت»: ئەو زاوایەیە، کە هەر لە ماڵا بێت.
«زیرەکی تەواو»: ئەو کەسەیە کە شعر بنووسێتەوە و بیخوێنێتەوە و هیچی لێ تێنەگا.
«داماو»: پیرەژنێکە، کەسێک بۆ ئیشێکی خێر لای لێ نەکاتەوە.
«نمایشگا»: کوڕی سەرخۆشان.
«خەناق»: میوانی دایمی.
«نوستن»: زڵیا و پڵیاوی هەژاران.
«خرخاڵ»: ئەنگوستیلەی پێ.
«دۆعای خێر»: ئیسحانی هەرزان.
«ژێرکراس»: مەحرەمی دایمی.
«ئومێد»: کەشکۆڵی بێ نەوایان.
«شەونم»: فرمێسکی چاوی شەو.
«مامان»: دەرکەوانی دوابڕاوەکە.
«چاو»: دەروازەی دڵ.
«حاجی لەقلەق»: ماڵاوایی زستان.
«گۆڕەوشار»: بن دەستی پیرێژن.
«بانگێژ»: جاڕچی خوا، دوژمنی خەو.
«پشت مل پان»: گێلوریابە دەست نەبەی بۆ پشت ملی خۆت..