کابرایەک هەبوو باوەنووری ناو بوو قەرز...
کابرایەک هەبوو «باوەنوور»ی ناو بوو. قەرزاری کابرایەکی شاری بوو. کابرا هەرچەند هاواری ئەکرد، باوەنوور هیچی نەبوو پێی بداتەوە. لە ئاخرا ڕۆژێ لە کەلەبەرێکا بە گیری هێنا و ڕاپێچی دا. باوەنوور وتی: بابە بۆ نیوەڕۆ وەرە بۆ ماڵەوە پارەکەم بۆ داناوی ئەتدەمێ.
باوەنوور چووەوە بۆ ماڵەوە بەڵام زۆر پەرۆش بوو. ژنەکەی لێی پرسی: بۆ چ وا دۆش دابردووی؟ وتی: وازم لێ بێنە قەرزاری کاورای شاریم، بە گیری هێنام و وتم پارەکەتم لە ماڵەوە داناوە. وەرە بۆی. ئێستا نیوەڕۆ دێت و هیچم نییە بیدەمێ. نازانم چی بکەم؟ ژنەکە وتی: خەمت نەبێ، کە هات من پێی ئەدەمەوە. کابرا وتی: چۆن؟ تۆ لە کوێت بوو؟ وتی: تۆ کارت نەبێ کە ئەو هات تۆ خۆت مەخەرە بەرچاوی، من جێبەجێی ئەکەم.
کابرای شاری بۆ نیوەڕۆ چوو بۆ ماڵی باوەنوور و لەبەر قاپی وەستا و داوای باوەنووری کرد. ژنە لە پێش ئەوەدا کە کابرا بێت هەندێ دڕک و داڵی لەبەر قاپییەکەی خۆیانا دانابوو ئەنجا چوو بە پێشوازی کابرا وتی: ها برا چییە؟ کابرا وتی: قەرزم لای باوەنوورە و بۆی هاتووم. ژنە وتی: بەخێر بێی هەقەکەت لای منە، من ئەتدەمێ. کابرا زۆری پێخۆش بوو وتی: دەبێنیە. وتی: ئەو دڕکانە ئەبینی لە بەر قاپییەکە؟ وتی: بەڵێ. وتی: قەرزەکەت بەو دڕکانەوەیە. وتی: چۆن؟ وتی: ئەوە ئەو دڕکانەم لەوێ داناوە بەیانی و ئێواران ئاوایی بەوێدا دێت و ئەڕوا، خورییەکانیان ئەبێ بە دڕکەوە، من لێی ئەکەمەوە و ئەیشۆمەوە و ئەیڕێسم و ئەیکەم بە جاجم؛ ئەیبەمە بازار و ئەیفرۆشم و ئەیدەم بە پارە، ئەیدەمەوە لە باتی قەرزەکەت.
کابرا ئەم کەین و بەینەی زۆر بەلاوە سەیر بوو دەستی کرد بە پێکەنین. باوەنوور لەسەر بانەوە خۆی شاردبووەوە، کە گوێی لە دەنگی پێکەنینەکەی بوو ملێکی لار کردەوە و سەیرێکی کابرای کرد، وتی: ها سەیرکە، کە هەقەکەی خۆی دەستکەوتۆتەوە لە خۆشیانا پێئەکەنێ!