کابرایەک هەبوو لە دێی تورجان مام ...
کابرایەک هەبوو لە دێی «تورجان» مام قەرەنی ناو بوو، کابرایەکی پیری شڕی هەژار بوو، سەروسەکوتی ئەوەندە سەیر بوو هەرکەس چاوی پێ ئەکەوت دەستی ئەکرد بە پێکەنین! کردەوە و هەڵسان و دانیشتنی وەکوو شێت وابوو کەچی شێتیش نەبوو!
گۆڕستانێک لە نزیکی تورجانە، زۆرتر مردووی ئەو ناوە دێننە ئەوێ. ڕۆژێک لەو دەورە مردوویێک ئەمرێ و ئەیهێننە ئەوێ. پیاوەکانی تورجانیش کۆ ئەبنەوە ئەچن بۆ گۆڕستانەکە بۆ ئەوەی لە ناشتنی مردووەکەدا لەوێ بن! مام قەرەنییش ماکەرە قۆڕێکی لاتی هەبوو، سواری بوو کەوتە شوێنیان. خەڵکەکە کە پێیان وت: مام قەرەنی پیاوەتیت ببێ مەیە، خەڵک و خوای بێگانە زۆر لەوێیە، ئێمە بۆ شیوەن ئەچین، بۆ شاییی ناچین، شوورەیییە نەوەک یەکێ بتبینێ بۆ ئێمە باش نییە، کە هاتینەوە دە ڕبە گەنمت ئەدەینێ. مام قەرەنی وتی: باشە و گەڕایەوە.
پیاوەکان چوون و گەیشتنە سەر گۆڕستانەکە و خەڵکێکی تری زۆریش لەوێ بوون. مام قەرەنی کەوتەوە بیری ئەوەی کە بە کام ڕبە گەنمەکەی ئەدەنێ! دوو ڕبە لە ئاوایییەکەیانا هەیە، ڕبەیەکی گەورە و ڕبەیەکی بچووک. هەستا چوو هەردوو ڕبەکەی هێنا، هەر یەک تاڵەبەنێکی تێخستن و بەستی بە کورتانی کەرە لۆتییەوە و خۆی سواری کەرە بوو. بەڕێ کەوت، بەنەکان درێژ بوون، ڕبەکان ئەخشان لە زەوییەکە، بەم تەق و هۆڕە و دیمەنەوە چوو بۆ گۆرستان.
مام قەرەنی لەپێشا خۆی بوو ئەتوت مەیموونە، ئێستا ئەم دوو ڕبەیەش وەکوو دوو کیسەڵ بە شوێن خۆیەوە بە تەق و هۆڕ زیادی کرد، ئەوەندەی تر دیمەنی پێ دابوو! کە چووە سەر گۆڕستان هەموو عالەمەکە دەستیان کرد بە پێکەنین! وتی: ئەوە بۆچ پێئەکەنن؟ من هاتووم بزانم بە کام ڕبە لەم ڕبانە گەنمەکەم ئەدەنێ، بە گەورەکەیان یان بە کچکەکەیان؟ با بۆم ساغ بێتەوە، وتیان: مام قەرەنی ئێمە وتمان با کەتن ڕوونەدا، کەچی ئێستا تۆ خراپترت کرد، بە خوا تازە دەنکت نادەینێ!