kabrayek hebû le dêy turcan mam ...

kabrayek hebû le dêy «turcan» mam qerenî naw bû, kabrayekî pîrî şiřî hejar bû, serusekutî ewende seyr bû herkes çawî pê ekewt destî ekird be pêkenîn! kirdewe û hełsan û danîştinî wekû şêt wabû keçî şêtîş nebû!

gořistanêk le nizîkî turcane, zortir mirdûy ew nawe dênne ewê. řojêk lew dewre mirdûyêk emrê û eyhênne ewê. pyawekanî turcanîş ko ebnewe eçin bo gořistaneke bo ewey le naştinî mirduwekeda lewê bin! mam qerenîyş makere qořêkî latî hebû, swarî bû kewte şwênyan. xełkeke ke pêyan wit: mam qerenî pyawetît bibê meye, xełk û xway bêgane zor lewêye, ême bo şîwen eçîn, bo şayîy naçîn, şûreyîye newek yekê bitbînê bo ême baş nîye, ke hatînewe de řibe genimit edeynê. mam qerenî witî: başe û geřayewe.

pyawekan çûn û geyştine ser gořistaneke û xełkêkî tirî zorîş lewê bûn. mam qerenî kewtewe bîrî ewey ke be kam řibe genmekey edenê! dû řibe le awayîyekeyana heye, řibeyekî gewre û řibeyekî biçûk. hesta çû herdû řibekey hêna, her yek tałebenêkî têxsitin û bestî be kurtanî kere lotîyewe û xoy swarî kere bû. beřê kewt, benekan dirêj bûn, řibekan exşan le zewîyeke, bem teq û hoře û dîmenewe çû bo goristan.

mam qerenî lepêşa xoy bû etut meymûne, êsta em dû řibeyeş wekû dû kîseł be şwên xoyewe be teq û hoř zyadî kird, ewendey tir dîmenî pê dabû! ke çuwe ser gořistan hemû ’alemeke destyan kird be pêkenîn! witî: ewe boç pê’ekenin? min hatûm bizanim be kam řibe lem řibane genmekem edenê, be gewrekeyan yan be kiçkekeyan? ba bom saẍ bêtewe, wityan: mam qerenî ême witman ba ketin řûneda, keçî êsta to xiraptirit kird, be xwa taze denkit nadeynê!