مەلایەک هەبوو شار بە شار ئەگەڕا، مەکری...
مەلایەک هەبوو شار بە شار ئەگەڕا، مەکری ژنانی ئەنووسییەوە کە بیکا بە کتێبێک. ڕۆژێ ڕێی کەوتە شارێ، ژنە بازرگانێ بیستی کە ئەم مەلایە هاتووە و ئیشی ئەوەیە. دۆزییەوە و ناردی بە شوێنیا، بۆ پاش نیوەڕۆ هێنایە ماڵەوە. لێی پرسی: هەتا ئێستا چیت نووسیوە لە مەکری ژنان؟ مەلاش وتی: خانم هیچ نەماوە نەینووسم و دوو سێ سەرگوزەشتی بۆ هەڵدا! لە پاشا ژنە وتی: سبەینێ بەڵکوو بۆ نیوەڕۆ بێیت بۆ ئێرە برایەکم لە وڵاتێکی دوورەوە، کاغەزێکم بۆ بنووسی بۆی، قاوەڵتییەکەشت لێرە بکە. مەلا وتی: باشە و لێی دا ڕۆیشت.
ژنە ئێوارە لەگەڵ مێردەکەیا چڵە مشکێنیان کرد لەسەر دەستێ جلی گروونی. بەیانی مێردەکەی چوو بۆ دووکان،. ژنەکە دەست و برد مردشکێکی سەر بڕی و مەنجەڵێ قوبووڵیشی لێنا. مەلا هات وتی: مەلا ئەوا قاوەڵتییەکی نایابم بۆ دروست کردووی کاغەزەکەم بەم جۆرە و واوا بۆ بنووسە هەتا نانەکە پێ ئەگا. لەولاشەوە چوو مناڵێکی دراوسێی نارد وتی: بە ڕاکردن بچۆ بە مێردەکەم بڵێ شتێکی خراپ قەوماوە هەر ئێستا بگەڕێتەوە بۆ ماڵەوە!
ئینجا دەرگای داخست و لە تەنیشت مەلاوە دانیشت. کاتێکیان زانی یەکێ زۆر بە پەلەپەل لە دەرگای دا، ژنە بانگی کرد کێیە؟ وتی: وەرە دەرگا بکەرەوە، دەی! ژنە مستەکۆڵەیەکی لە سنگی خۆی دا وتی: ئەیە ڕۆ ئەوا مێردەکەم هاتەوە، خوا ئەزانێ ئەوەندە دڵی پیسە هەر نەبێتەوە! چاوی بە توولەیەک بکەوێ هار ئەبێ ئێستا هەر چاوی بە ئێمە بکەوێ بە خەنجەر هەردووکمان شەق و پەق ئەکا!
مەلا وتی: بۆ خاتری خوا خۆت چارێ بدۆزەرەوە. وتی: مەلا چار هەر ئەوەیە بچیتە ناو ئەو سەندووقە گەورەیەوە و نەفەس لە خۆت ببڕی! مەلا وتی: باشە و گورج چووە سەندووقەکەوە. ژنەکە قوفڵێکی لە سەندووقەکەدا، کلیلەکەی نایە گیرفانی و ڕای کرد بۆ قاپی، قاپی کردەوە و مێردەکەی هاتە ژوورەوە و وتی: ئەوە چی قەوماوە؟
ژنە وتی: لەمە خراپتر چی بقەومێ؟ هەی ڕۆ، هەی ڕۆ ئینجا ئەم حسمەتە لە کوێ بێنمەوە؟! مێردەکەی وتی: چی بووە زوو پێم بڵێ دڵم تەقی. وتی: پیاوەکە! دوێنێ مەلایەک هاتبوو، مەکری ژنانی ئەنووسی، هات لە ڕێی خوادا دوێنێ ئێوارە، مەنیش چەند پوولێکم دایە، کەچی ئیمڕۆش هاتەوە، زەلامێکی مل هوڕ پەلاماری دام و خستمی. دەرپێیەکەمی لەتوپەت کرد! لە هاوار هاواری من ئەو منداڵی دراوسێیە هات بە دوای تۆدا!
وتی: ئینجا مەلاکە چی لێ هات؟ وتی: کە تۆ لە قاپییکەت دا ئیتر وازی لە من هێنا و چووە ناو ئەو سەندووقە گەورەیەوە، منیش قوفڵم لێدا، ئێستا ئەوەتە لە سەندووقەکە دایە!
کابرا خەنجەرەکەی هەڵکێشا و وتی: ئا بدە کلیلەکە. ژنە کلیلی دایە دەستی، کابرا کلیلی نا بە قوفڵەکەوە! ژنە وتی: های، های نەمانبردەوە؟ و دەستی کرد بە پێکەنین بە خوا دەستێ جلی گوروونی باتمانیم ئەوێ؟! مێردی وتی: بۆ چی ئەمە مەبەستت لەم بەند و باوە ئەوە بوو کە چەڵە مشکێنییەکە لێ بەریتەوە ژنەکە پێکەنی و وتی: ئەرێ وەڵڵا. کابرا کلیلەکەی فڕێ دا و خۆی تووڕە کرد و وتی: ئاخر ئەمە ئیش بوو تۆ کردت؟ من ناوکم کەوت! ژنەکە وتی: قاوەڵتی بکە! مێردەکەی وتی: قوزەڵقورت ئەخۆم و بە مۆنییەکەوە لێی دا ڕۆیشت!
لە پاش ڕۆیشتنی مێردەکە، ژنەکە سەندووقەکەی هەڵگرت، کە تەماشای کرد مەلای قوڕبەسەر ڕەنگی پێ نەماوە، هەر چاوی زەرد ئەچێتەوە! ئینجا پێی وت: مەلا هەڵسە قاوەڵتی بکە! مەلا وتی: بۆ خاتری خوا! تۆ دەرگاکەم لێ بکەوە بڕۆم بە خوا قاوەڵتی تۆم ناوێ! وتی: مەلا دەسا مەلا! تکات لێ ئەکەم ئەم سەرگوزەشتەیەش بخە کتێبەکەتەوە! مەلا وتی: تۆبە، شەرت بێ بە شەرتی پیاوان ئیتر جارێکی تر باسی ژن نەکەم، خۆیان و مەکریان بە گەرووی ئاشا بچن!