melayek hebû şar be şar egeřa, mekirî...
melayek hebû şar be şar egeřa, mekirî jinanî enûsîyewe ke bîka be kitêbêk. řojê řêy kewte şarê, jine bazirganê bîstî ke em melaye hatuwe û îşî eweye. dozîyewe û nardî be şwênya, bo paş nîweřo hênaye małewe. lêy pirsî: heta êsta çît nûsîwe le mekirî jinan? melaş witî: xanim hîç nemawe neynûsim û dû sê serguzeştî bo hełda! le paşa jine witî: sibeynê bełkû bo nîweřo bêyt bo êre birayekim le wiłatêkî dûrewe, kaẍezêkim bo binûsî boy, qawełtîyekeşt lêre bike. mela witî: başe û lêy da řoyşit.
jine êware legeł mêrdekeya çiłe mişkênyan kird leser destê cilî girûnî. beyanî mêrdekey çû bo dûkan,. jineke dest û bird mirdişkêkî ser biřî û mencełê qubûłîşî lêna. mela hat witî: mela ewa qawełtîyekî nayabim bo dirust kirdûy kaẍezekem bem core û wawa bo binûse heta naneke pê ega. lewlaşewe çû minałêkî dirawsêy nard witî: be řakirdin biço be mêrdekem biłê şitêkî xirap qewmawe her êsta bigeřêtewe bo małewe!
înca dergay daxist û le tenîşt melawe danîşt. katêkyan zanî yekê zor be pelepel le dergay da, jine bangî kird kêye? witî: were derga bikerewe, dey! jine mistekołeyekî le singî xoy da witî: eye řo ewa mêrdekem hatewe, xwa ezanê ewende diłî pîse her nebêtewe! çawî be tûleyek bikewê har ebê êsta her çawî be ême bikewê be xencer herdûkman şeq û peq eka!
mela witî: bo xatrî xwa xot çarê bidozerewe. witî: mela çar her eweye biçîte naw ew sendûqe gewreyewe û nefes le xot bibřî! mela witî: başe û gurc çuwe sendûqekewe. jineke qufłêkî le sendûqekeda, kilîlekey naye gîrfanî û řay kird bo qapî, qapî kirdewe û mêrdekey hate jûrewe û witî: ewe çî qewmawe?
jine witî: leme xiraptir çî biqewmê? hey řo, hey řo înca em ḧismete le kwê bênmewe?! mêrdekey witî: çî buwe zû pêm biłê diłim teqî. witî: pyaweke! dwênê melayek hatbû, mekirî jinanî enûsî, hat le řêy xwada dwênê êware, menîş çend pûlêkim daye, keçî îmřoş hatewe, zelamêkî mil huř pelamarî dam û xistimî. derpêyekemî letupet kird! le hawar hawarî min ew mindałî dirawsêye hat be dway toda!
witî: înca melake çî lê hat? witî: ke to le qapîyket da îtir wazî le min hêna û çuwe naw ew sendûqe gewreyewe, minîş qufiłim lêda, êsta ewete le sendûqeke daye!
kabra xencerekey hełkêşa û witî: a bide kilîleke. jine kilîlî daye destî, kabra kilîlî na be qufłekewe! jine witî: hay, hay nemanbirdewe? we destî kird be pêkenîn be xwa destê cilî gurûnî batmanîm ewê?! mêrdî witî: bo çî eme mebestit lem bend û bawe ewe bû ke çełe mişkênîyeke lê berîtewe jineke pêkenî û witî: erê wełła. kabra kilîlekey fiřê da û xoy tûře kird û witî: axir eme îş bû to kirdit? min nawkim kewt! jineke witî: qawełtî bike! mêrdekey witî: quzełqurit exom û be monîyekewe lêy da řoyşit!
le paş řoyştinî mêrdeke, jineke sendûqekey hełgirt, ke temaşay kird melay quřbeser řengî pê nemawe, her çawî zerd eçêtewe! înca pêy wit: mela hełse qawełtî bike! mela witî: bo xatrî xwa! to dergakem lê bikewe biřom be xwa qawełtî tom nawê! witî: mela desa mela! tikat lê ekem em serguzeşteyeş bixe kitêbeketewe! mela witî: tobe, şerit bê be şertî pyawan îtir carêkî tir basî jin nekem, xoyan û mekiryan be gerûy aşa biçin!