حەمە بەگی قادر بەگی جاف عەمری خوای...
حەمە بەگی قادر بەگی جاف عەمری خوای کردبوو. پێ خۆیک قوڕیان گرتبۆوە زەلامێک بە خاکە نازەوە ڕاوەستابوو هەرکەس بهاتایە خاکە نازێ قوڕی ئەدا سەریا و هەر ئەغاڕۆشی ئەکرد. کابرایەکی مسگەری سنەیی لە ئاواییەکەدا بوو، بە لای زەلامەکەدا ڕابوورد و ئەویش گورج خاکە نازێ قوڕی دا بە سەر مسگەردا و وتی: دەی مسگەر تۆش ئاغاڕۆ بکە!
ئەویش هیچ خۆی تێک نەدا، دەستی کرد بە شیوەن و مەنجەڵی گەورە گەورەی چێشت لێنرابوو، مسگەر چوو پشکۆیەک ئاگری زلی هێنا، کابرای خزمەتکار کۆڵەنجەی لە بەرا نەبوو و یەخەی کرابوەوە، تیلمە بەنێکیشی لە پشتا بوو، مسگەر پشکۆکەی هاویشتە باخەڵیەوە و هەردوو دەستی گرت و وتی: با پێکەوە شیوەن بکەین!
زەلامەکە، تینی پێگەیشت و وتی: کورە بەرم دە سووتام مسگەر وتی: هەقتە بسووتێی ئاغات ئاغای چاک بوو. وتی: کوڕە مسگەر بەرم دە سووتام وتی: هەر تۆ نەسووتاوی ئێمەش سووتاین! وتی: مسگەر مردگت مرێ بەرم دە گڕم تێ بەر بوو! وتی: ئافەرین بۆ تۆ بەخوا خزمەتکارێکی دڵسۆز و بە وەفای بۆ ئاغاکەت وتی: مسگەر، کەرانباوگاو بەرم دە بە ئاگری ڕاستەقینە سووتام! ئیتر مسگەر دەستی بەرەڵا کرد، بەڵام کابرای قوڕ بەسەر لارقەبرغەی بە تەواوی سووتابوو!