شێخێک لە نۆڕەباب هەڵکەوتبوو، هەناسەی...
شێخێک لە «نۆڕەباب» هەڵکەوتبوو، هەناسەی گیرا و دوعای لە کارا بوو، شێت و هاری چاک ئەکردەوە، دزراوی ئەدۆزییەوە، بەستراوی ئەخستە کار تۆبەی دز و درۆزنی دائەدا، گەلێ بۆ گەل بە خزمەت بوو. ڕۆژێک کوێخا مستەفای «بیورە» چووە خزمەتی و وتی: یا شێخ تۆ ئەم فەیز و بەرەکەتەت هەیە، کە مردی لە کیسی هەموومان ئەچی، ئەولادێکت نییە جێت بگرێتەوە با ژنێکت بۆ بێنین، خۆیشت لەززەتی ژن و مێرد ئەبینی و ئەولادەکەیشت کەڵکی خزمەتی قەومەکەی پێوە ئەبێ. بەم جۆرە شێخی خستە سەر سەودا.
شێخ هەڵسا چووە خزمەت مەلا مەحمووی بارێ و وتی: قوربان ڕوویان لێ ناوم ژن بێرم. فەرمووی: باشە پێغەمبەر فەرموویەتی «النكاح سنتيعربی».
پرسی: قوربان ژنی چۆنی بێنم؟ فەرمووی: ژنێک بێنە خۆشەویستی بزانێ، نەوەی باش بخاتەوە و مەیلی چاکەی لە ڕەگەزدا بێ، خۆت لە سێ جۆرە ژن بپارێزە، لە بێوەژنێ کە مێردی مردبێ، هەر ساتە نە ساتە ئەڵێ ڕەحمەتییەکە ئەیشێلام، بۆنی ئەکردم پێی ماچ ئەکردم، لە ژنێ کە دەوڵەمەند بێ و بە هۆی پارەکەیەوە شانازی بکا و منەت بە سەر پیاوانا بنێ، لە ژنێ کە مەکرکەرە و بە ئاین و ئۆین بێ، هەمیشە خۆی بخا و بە نکەنک بۆڵە بکا. قەیرەکچ باشە قەدرزانە، پیرێژن ژارە هەناسەی مارە، ژن لە عومری دەوە تا بیست حەزی نەفسە، لە بیست تا سی بۆ دڵداری و یاری و دیاری، لە سی تا چل دایک منداڵ، لە چل تا پەنجا سەرە و کاری ماڵ، لە پەنجا بە دواوە خوایشی لێ ڕەنجا!
بەم حسابە شێخ هاتە سەر ئەمەی کچێک بێنێ، بەڵام زۆرتر لە دڵی خۆیا سەودای کەوتە سەر ئەوە نەشمیلەیەکی خنجیلە بێنێ، یەکێ لە ئاغا لێکەوتووەکانی «سنجەڵێ» کچێکی جوانی ناسکۆڵەی بوو گۆرانییان پیا هەڵدابوو:
شێخ مەیلی چووە سەری، هەرچەند وتیان: یا شێخ ئەوە منداڵە لە ڕێی تۆدا نییە، ئەوانە کۆنە چەکمە ڕەقن لووتیان بەرزە، بە پارەی سەرقەڵەمانەی نووشتە و دەسەنە بەڕێوە ناچن. ئەو گوێی نەدایە، خوازبێنی کرد، ئەوسایش کچ وەکوو ئێستا نەکەوتبووە سەروکڵاوی خۆی بە هەموو کەسێکیان ئەدا، دایانێ.
سا ساڵی تێ وەرنەگەڕایەوە کۆنە داخوازێکی شەوێ وەکوو گۆرانییان پیا هەڵدابوو وتبووی:
لە دەرگاوە بانگی کرد. وتی: بەڵێ و هەڵات! کاتێکیان زانی چوونە «نەنۆڕ» ماڵی مەحموود بەگە شەلە - کە بێ دینی بۆ دوژمنی شێخان - لەوێ بۆخۆی لەگەڵ لاوە خۆشەویستەکەی جوتیان گرت و شێخ بە تەنیا مایەوە. ئینجا شێخ کە جاران نیوەشەوان دەنگی زیکر و قورئانی ئەهات، ئەمجا هەموو شەوێ بە کۆڵێ گریانەوە ئەی گوت: