عەجەب فەڕبەخشەن
از کتاب:
هەوارگەی دڵان
اثر:
سید طاهر هاشمی (1915-1991)
2 دقیقه
659 مشاهده
عەجەب فەڕبەخشەن ...
عەجەب فریشتەی شۆخ فەڕبەخشەن
نە ڕووی گۆی زنجش خاڵانش نەخشەن
زوڵفش نە ئاقار شەمامان پەخشەن
ئاهووی سونبوڵ چەر وەڵەدەی وەخشەن
سایەی سام سەنگین نە جا نەلەخشەن
لەب مایەی حەسرەت، لاڵ بەدەخشەن
عاشق پەی ماچش، مەینەتان مەخشەن
چمان کە زوهرەی سوب سەڵاتمەن
سەد جار جە دووریش خەم خەڵاتمەن
شنۆی هەناسەش، بۆی مشکنافەن
ئەگریجەش مایەی ئوستای زەڕبافەن
هومای هومایۆن قولەی کۆی قافەن
دڵبەر دڵ جە سەنگ، دوورجە ئینسافەن
ستارەی سوبدەم، گەردوون مەتافەن
وە حەربەی موژگان، خارا شکافەن
نەواچی سینەش چەنی من سافەن
ڕەند نەچیر دۆز، مشکین کڵافەن
وە مەودای پەیکان ئەو قنیاتمەن
سەدجار جە دووریش خەم خەڵاتمەن
تەکدان ئەو پای سەخت بەرز سەرکاوان
سەهەردان جە عەتر دوو لیمۆش ئاوان
نەسیم وە حەڵقەی زوڵفش نیاوان
ئەر یاوان تەوسیف شێوەش نەتاوان
چون من وەنەوشەی گۆشەی شەتاوان
پەی نوقتەی خاکش مەکیشۆ تاوان
یاحەی، باوانش بمانۆ ئاوان
نەرگس وەشبۆ و وەنەوشەی ساوان
جە سەودا، سەفەرهات نەهاتمەن
سەد جار جە دووریش خەم خەڵاتمەن