خەم خەڵاتمەن
از کتاب:
هەوارگەی دڵان
اثر:
سید طاهر هاشمی (1915-1991)
2 دقیقه
488 مشاهده
خەم خەڵاتمەن ...
جە دووری دڵبەر، خەم خەڵاتمەن
وەسواسەی ئازیز دووروڵاتمەن
پەژارەی زوهرەی سوب سەڵاتمەن
دەردینان وەداخ کۆگای دەردمەن
خەزانان زایف ڕەنگ زەردمەن
شێتان سەوداسەر سەودای سەختمەن
سەرسامان سادار سایەی بەختمەن
ئەر مەینەت وڕەنج، ئەرجەفا و خەمەن
یەکسەر جە نەحسی تاڵەی من جەمەن
چۆڵ بێدی گێڵ، سەرهەردان ماوام
سەر نەتاش سەخت، مەغاران ساوام
کەردەنم وە زێد قولەی سەرکاوان
ئاهم وە پایەی هەفت ئەفلاک یاوان
نگام نە سەیران کوڵ ئاڵەم ڕەستەن
دیدەم نە ئاسۆی ئاسمان بەستەن
تا کەی بەربەیۆ سەعید ستارەم
جە پرشەی شۆڵەش سفید بۆ چارەم؟
وەشەن بەربەیۆ نەسوب سەحەردا
تەوەن دۆ وە تاڵ شەمس و قەمەردا
بەو شەرت مهرەبان دەردین نەواز بۆ
بەڵێ وێش زوهرەن، موشتەری واز بۆ
نەک وێنەی مڕڕیخ بوڵەند دەماخ بۆ
هوونڕێز و بێباک، عاشق وە داخ بۆ
پێشانیش ڕەخشان نەسەر زاخان بۆ
قەرەداخ دڵ پێش چراخان بۆ
جە شەوق شۆڵەی ئەو بەرگوزیدەم
سەر کەرۆ سەیلاو دێوانەی دیدەم
ئەوسا وێنەی قەیس یارم بەڵا بۆ
مەکانم سەر هەرد گەورە قەڵا بۆ