گوڵی سوور
از کتاب:
گوناهـ
اثر:
علی حسنیانی (1939-1992)
1 دقیقه
2284 مشاهده
گوڵی سوور و گەش و بۆخۆش و جوانم!
گوڵی سووری وڵاتی کوردەواری!
دەزانی بۆ جوان و دڵنشینی؟
لەنێو مێرگی وڵاتمدا دیاری
***
وەبیرت نایە زۆر پێش هاتنی تۆ
لە جێی تۆ لاوێکی کوردی شەهید بوو
ئە لەم جێگایە وا هاتوومە دنیا
گوڵێک پێش تۆ خەزانی دی و لە دەس چوو
***
ئەتۆ جوانە گوڵی سووری وڵاتم!
لە خوێنی پاکی ئەو کوردەی ڕواوی
لەبەر وەی تۆ تەمەن کورتی گوڵی من!
کە بیری خوێنێکی ناهەق ڕژاوی
***
هەموو ڕۆژێ بە یادی لاوی کوژراو
بە سەرتا ئاسمان ئەسرین دەڕێژێ
دەڵێی دایکێکی زگ سووتاوی دیلە
کە تاقانەی بە دەستی خۆی دەنێژێ
***
شەماڵیش دێت و وەک ئاواڵێکی باش
بە سەبرا دەستڕێ ئاونگی سەر ڕووت
ئەتۆش کاتێ دەبینی باوەفایان
بزەت دێت و لەگەڵ شادی دەبی جووت
***
گوڵی سووری وڵاتی کوردەواری
بە ئاواتم کە دایم گەش بمێنی
کە یادی خوێنی کوردێکی بەنرخی
جوانی، خۆشەویستی، ڕەنگی خوێنی