ئازیز ویەردەن

از کتاب:
دیوانی ئەحمەد بەگی کۆماسی
اثر:
احمد بیگ کوماسی (1795-1877)
 1 دقیقه  837 مشاهده
ئازیز ویەردەن، ئازیز ویەردەن
وادەی غەمناکیم جە حەد ویەردەن
وەسوەسە و خەیاڵ کارێ پێم کەردەن
بێزارم جە گیان، ڕازیم وە مەردەن
زیندەگیم مەرگەن، ژیانم تاڵەن
کوورەی دەروونم، سفتەی زوخاڵەن
قنیاتم ئاهەن، خۆراکم خەمەن
سوپای مەینەتان جە لای من جەمەن
ئەر نەبۆ بە کوفر، جیهان ئافەرین
بیللا بێزارم جە گیانی شیرین
فام پێم نەمەندەن وێنەی سەرسامان
ها وەختەن بگنۆ نامم جە نامان
دڵ پۆشان جامەی سیای قەترانی
وەختەن پێم واچان سەنعانی سانی
بە گیانت قەسەم نەونەمامی نۆ
بەو حاڵە منم گاوری سەرکۆ بۆ
دووریت پیاڵەی زووخاو پێم وەردەن
تۆ وەش، تەدارەک مەردەنیم کەردەن