دایێ تو مەگری
از کتاب:
شەفاق
اثر:
جگرخون (1903-1984)
3 دقیقه
1447 مشاهده
رۆم و عەجەم تەڤ وەلات ڤەگرتن
بندەست دژین ئەم، ژ بەر کو کوردن
چرا و رەوشەن ل مە ڤەمرتن
گەر بێنە کوشتن، دایێ تو مەگری!
خوەندن نەهشتن ل ناڤ مە کوردان
نە هش،نە بیر مان ژ ئێش و دەردان
ئەڤ باخ و بوستان، ژ دەست خوە بەردان
گەر بێنە کوشتن، دایێ تو مەگری!
شێخ و بەگان تەڤ ئەم کرنە کۆلا
بێ ماف و بێ جی بەردانە چۆلا
دان سەر ملێن مە دارێن دەهۆلا
گەر بێنە کوشتن، دایێ تو مەگری!
مزگین! تو شابە ڤا ئەم دخوێنن
ئازادیخوازێن جهان دبێنن
دڤێ کو دژمن ب زۆر دەرێنن
گەر بێنە کوشتن، دایێ تو مەگری!
ڤا ئەم شیاربوون، خوەندە و زانا
مە رێ تەڤ گرتن ژ بەر نەزانا
زوو، زوو مە ناسکر ئەڤ رەنگ دزانا
گەر بێنە کوشتن، دایێ تو مەگری!
دژمن دو نفشن : هوندر و دەرڤە
هنەک د بنڤە، هنەک د سەرڤە
کوردێن نەزان ژی تێن مە ب سەردە
گەر بێنە کوشتن، دایێ تو مەگری!
دڤێ ژ بۆ تە ئەم راست ببێژن
بندەست و کۆلا تم ژیندرێژن
نابن خوەدی ماف، خوینێ نەرێژن
گەر بێنە کوشتن، دایێ تو مەگری!
ئەم تەڤ دچن تێن، دۆلاب و چەرخن
مەبینە کۆ ئەم جوان و فەرخن
دڤێ کو دژمن ژ ناڤ خوە دەرخن
گەر بێنە کوشتن، دایێ تو مەگری!
دڤێت ب لەشکەر هەرن زناران
کۆنێ خوە ڤەگرن ل پێش نەیاران
ئێریش بکن ئەم ب گوللەباران
گەر بێنە کوشتن، دایێ تو مەگری!
رەشا خوە باڤێژ، داینا جلێن خوە
کەلاشینکۆفێ باڤێژ ملێن خوە
خەمان ئەم دەرخن ژ ناڤ دلێن خوە
گەر بێنە کوشتن، دایێ تو مەگری!
سووندێ دخون ئەم ب پووت و لاتە
هەتا کو نەگرن زاب و فەراتە
سەربەست نکارن ئەم بێنە با تە
گەر بێنە کوشتن، دایێ تو مەگری!
رابە ب هەڤرە ئەم هەرنە شاخان
دەرمان بکن ژن : لاش و کەلاخان
رۆنی بدن خوەش رەنگێ چراخان
گەر بێنە کوشتن، دایێ تو مەگری!
ملێن خوە بدنە ملێن مە شێران
د شەڤرەشان بن رەنگێ ستێران
شێر تەڤدە شێرن، چ ژن چ مێران
گەر بێنە کوشتن، دایێ تو مەگری!
دایێ ئەم خۆرتن خوینا مە گەرمە
بندەست بمێنن ژ بۆ مە شەرمە
تا کەنگی دژمن پاشا ل سەر مە ؟
گەر بێنە کوشتن، دایێ تو مەگری!
ئیدی مە ناڤێن ئەڤ رەنگ و ئەڤ ژین
ئەم تەڤ شیاربوون فەرهاد و شێرین
ئەم گوهـ ددێرن دەنگێ جگەرخوینتخلص
گەر بێنە کوشتن، دایێ تو مەگری!