ئازادیخوازم
از کتاب:
شەفاق
اثر:
جگرخون (1903-1984)
3 دقیقه
1213 مشاهده
تیپ و لەکێن کورد کەتن زناران
ل هاویر بومبا بوو گوڵەباران
ئێریس دبن دەر کۆمێن نەیاران
دە رابە سەر خوە، کورێ من رابە!
شەڤ تا سپیدێ مە نینە قەت خەو
جهان ل بەر مە دبیتە رەورەو
نێرکەو نەخوەنی، چ بێئی مێکەو؟
دە رابە سەر خوە، کورێ من رابە!
باڤێ تە چوو شەر، شێرە ل مەیدان
ئێریش دبن سەر ئیران و تووران
دەستێن خوە دان هەڤ کورمانج و دۆستان
دە رابە سەر خوە، کورێ من رابە!
کەنگی مەزن بوو، دڤێم بخوێنی
رەوشا جهانێ تو خوەش ببێنی
ژ نوو تو کاری دژمن دەرێنی
دە رابە سەر خوە، کورێ من رابە!
کەچ و کورێن کورد هەمی شییاربن
ژ بۆ سەربەستی هەمی ل کاربن
ژ هەڤرە دۆستبن، دژێ نەیاربن
دە رابە سەر خوە، کورێ من رابە!
دژوارە دژمن، تووران و فرسە
گەرناس و مێربە، ژ وان مەترسە
سبێ شیاربوو، ل من مەپرسە
دە رابە سەر خوە، کورێ من رابە!
ژ بۆ خوەشبن دەم و گەڤێن تە
ئەزێ سپیدێ بغێ باڤێ تە
بەرە زوابن هەردو چاڤێ تە
دە رابە سەر خوە، کورێ من رابە!
ملێن خوە بدمە ملێن بەرانە
د شەردا ئەن تەڤ خووشک و برانە
ئێریش بکن ئەم، لێ شەر گرانە
دە رابە سەر خوە، کورێ من رابە!
بزانە، خوەندن ژ بۆ وە دەرمان
دا کو بزانن قانوون و فەرمان
دەرخن ژ دل ئەم ڤان ترس و شەرمان
دە رابە سەر خوە، کورێ من رابە!
دەستێن خوە بدنە دەستێن چەپێن رۆم
ببن پارتیزان ب لەشکەر و کۆم
جارەک مەترسن ژ «هۆک» و «فانتۆم»
دە رابە سەر خوە، کورێ من رابە!
دبی باڤێ تە د شەردە بمری
زنهار کورێ من نەبی تو بگری
ئەم تەنێ کوشتن ژ بۆ تو نەمری
دە رابە سەر خوە، کورێ من رابە!
دژمن ناچی دەر ب لاڤ و گازێ
خوینێ نەرێژی ناغێ داخوازێ
سبا دچم شەر دڤێم تو رازێ
دە رابە سەر خوە، کورێ من رابە!
شەخ و مەلان ئەم تەڤ کرنە دەروێش
ئەڤ بوو دو سەد سال، ئەم بوونە بەربێش
با بێنە کوشتن، نەمێن ئەڤ ئەش
دە رابە سەر خوە، کورێ من رابە!
شین تێ ب خوینێ دارا سەربەستی
ئیدی ناخوازن دیلی، بندەستی
ئەڤ ئێلپەرەستی، ئەڤ ئۆلپەرەستی
دە رابە سەر خوە، کورێ من رابە!
مرۆڤپەرەستم مینا جگەرخوین
سەربەست بژین تەڤ، نە وەک «مەم و زین»
ژینا سەربەستی، دڤێ مە ئەڤ ژین
دە رابە سەر خوە، کورێ من رابە!