سۆسەن گوڵێ دیم بۆش چوون عەنبەر بی
از کتاب:
دیوانی بێسارانی
اثر:
بیسارانی (1643-1702)
1 دقیقه
623 مشاهده
سۆسەن گوڵێ دیم، بۆش چوون عەنبەر بی
دەهەن شکەستەی، بادی سەحەر بی
یەقین خۆ نەوخێز خونچەی ساوا بی
جە وەش بۆش ماوای خوتەن ئاوا بی
بەڵێ سوب سەحەر پێکابێ لافێ
زوڵف لوول لەولاو، موشکین کڵافێ
واتش منیچ بۆم، وێنەی بۆی زوڵفەن
وەلێ ئەو چین چین سەرتاپا کوڵفەن
نمەز بای شەماڵ، جە ڕووی زوڵف دەستە
چەنەش مژنەوۆ چەند لاف بەی جەستە
بێ حیساب قارێ نە دڵ مبەرۆ
بێ جا دەهانش شکەست مدەرۆ
جە پێکای ئەو لاف بێ مەوزوونەوە
هێمای دەهانش ها بەو خوونەوە