ئاهووی خوتەن خێز، دیدە تیر خەتا
از کتاب:
دیوانی بێسارانی
اثر:
بیسارانی (1643-1702)
1 دقیقه
1442 مشاهده
ئاهووی خوتەن خێز، دیدە تیر خەتا
تاتاری ڕەوێڵ، نافە موشک مەتا
وەقت نیمە شەو، خاو مەیۆ نەزد ئەو
تمەز دیدەی وێش مەوینۆ نە خەو
جە سامی موژەی وێش بێدار مەبۆ
دەرسات بێ پەروا جە ڕەم تار مەبۆ
بەڵێ چێش مەبۆ، ڕەوان، خاترشاد
جە وەشی دەوران، سافی سەر ئازاد
ئەحیاوان پڕگوڵ، ناڵەی بولبولان
دایەرەی زنجیر زوڵف سونبلان
مەبۆ بە پابەند ئەی خوتەن خێزە
ئەی ئاهووی ڕەوێڵ، موشک ناف بێزە
بۆی خوتەن مەیۆ، ئاهووی تافەوە
تاف پێچان بە بۆی موشک نافەوە
ئیسە کەردەنش بە زێد، هەم ماوا
ئاوا بۆ شەڵڵا، پێش نیەن ئاوا؟
یا شا بەشقی وێت خاتر ئازادان
نەڕێشان نە دام ناشی سەیادان