ahûy xuten xêz, dîde tîr xeta
Li pirtûka:
Dîwanî Bêsaranî
Berhema:
Bêsaranî (1643-1702)
1 Xulek
1536 Dîtin
ahûy xuten xêz, dîde tîr xeta
tatarî řewêł, nafe muşk meta
weqit nîme şew, xaw meyo nezd ew
timez dîdey wêş mewîno ne xew
ce samî mujey wêş bêdar mebo
dersat bê perwa ce řem tar mebo
bełê çêş mebo, řewan, xatirşad
ce weşî dewran, safî ser azad
eḧyawan piřguł, nałey bulbulan
dayerey zincîr zułf sunbilan
mebo be pabend ey xuten xêze
ey ahûy řewêł, muşk naf bêze
boy xuten meyo, ahûy tafewe
taf pêçan be boy muşk nafewe
îse kerdenş be zêd, hem mawa
awa bo şełła, pêş nyen awa?
ya şa beşqî wêt xatir azadan
neřêşan ne dam naşî seyadan