فەسڵی نەو پاییز تازە کەردەن مەیل
از کتاب:
دیوانی مەولەوی
اثر:
مولوی (1806-1882)
1 دقیقه
1322 مشاهده
فەسڵی نەو پاییز تازە کەردەن مەیل
شەماڵ هەرزان کەرد ڕشتەی نەو سوەیل
گێجی سەرکاوان جە سەردی بین کەیل
بۆ مدان چون بۆی بێوەفایی لەیل
ئازیز تاقەت شی ئاخر نەفەسەن
رەحمێ کەر ئامان، ئیستیغنا وەسەن
بەر کەنار کزەی دەروون پڕ داخان
پەی تۆ تەسدیعەن سەردیی لەیلاخان
جە قەتارەی خێڵ دیدە سیاوان
باقی هەوارگەی گەرمیان ئاوان
گەرمەسێری دڵ مەعدوومیتخلص نەبۆ
وارگەش خاڵییەن قیبلەم دوور جەتۆ
کۆچێ کەر وە خەیر مەنزڵ وە مەنزڵ
تا قەدیم وارگەی گەرمیانی دڵ
نەیاوایی، های ساقی زۆر ئاوەرد
تەفاوت نە بەین وەسفی ئازیز کەرد
نمەدۆ نە چەم تاری دڵەی تەنگ
بێوەفایی دۆس سەفا و وەفا ڕەنگ
چون تەمام نە تەم غەفڵەتەنان گوم
سا مەی، نەک وە جام، های وە خوم وە خوم
تا یەکسەر مایەی خامیم بسانۆ
چون جەماڵ جەلال جەلام بنمانۆ