تا لە سەر مابێ، هەوایی ڕەشبەڵەک
از کتاب:
دیوانی ڕاجی
اثر:
راجی (1912-1969)
3 دقیقه
145 مشاهده
تا لە سەر مابێ، هەوایی ڕەشبەڵەک
باخ و فرمێسکی گرینم دێتە چاو
تاکوو پەرژین کەم، ڕەزی سینگی بە چەک
باخەوان ئەیبا و، ئەمێنم بەش بڕاو
وا ئەبێ تلیانە گوڵ بچنن مەچەک
واش ئەبێ پووز و بەلەک دەرکەونە ئاو
بشمەوێ گەر دابنیشین، تەک بە تەک
ناگەمە ئاخیر هەواری ویستراو
گەر شەوێکیش ڕێکەوێ، کەوڵی وشەک
چقڵی بێگانان بە ڕۆژ ئەگرێ هەناو
با بچێژم زامی زۆر کوچک و کوتەک
مردنم چاتر، لە دەرگەی داخراو
من کەسوکارم ئەتۆی مردوو مراو
من دەس و زارم ئەتۆی، بێ چاووڕاو.
ژینەوە چەند مێرگ و، نێرگس پێگەیین
ڕووی سپی و، چاوانی زەرد و، بۆنی ساڵ
خۆش ئەبوو هێندەی ڕووانی و پێکەنین
زەردەخەندەی خونچەشی هێنایە پاڵ
ئابڕووی جوانی ڕژایە نا وو دین
ڕەنگ و بۆی شادی کرایە بەیتەماڵ
تا لە بێهۆشی مە دوژمن تێگەیین
هیچ میراتگر نەماون کورد و کاڵ
خاوەنی باخان، وەجاخ کوێرن لە ژین
ئەو بەرانبەر وەسییەتی خزمیشە لاڵ
دواکەون خوشکیش، بە بێ مارە بڕین
داکی سەرشینیش، کە زاوای کردە زاڵ
من ئەوا تۆم چووی و، مام بێ ماڵ و حاڵ
بێ برا و کوڕ، بێ کەس و بێ مام و خاڵ
من کەسوکارم ئەتۆی مردوو مراو
من دڵ و زارم ئەتۆی، ئەی کوردی خاو.
ئاخ، بڵێم کێ بێ لە ئێمە هەڵکەوێ
دوژمنی ژنهەڵگرە، کێڵای زەوی
وا سەرۆک مارە کران، بوونە هەوێ
حەز لە ئێکیشیان بکەی، داناکەوی
ئەو ئەویتر سووک ئەکا، تا نەسرەوێ
جا کە باتداوە، لەگەڵ ویش ناخەوی
سا وەها چاکە بکەی بیرێکی نوێ
بیدە دوژمن، قوزفرۆشانی کەوی
وەک کەری ناو ئێستری جوو دانەوێ
تۆش بڵێ ئاخ سوێندەکەم خۆ هەر هەوی
بار بە کۆڵ دادە، بڕۆ لێرە و لەوێ
کۆکەوە زۆر کۆڵ بە شانی پەل قەوی
ئەو حەلە، ئەی نووری چاوم ناکەوی
ئەو دەمە، وەک خەو لە چاوم ناڕەوی
من دڵ و دینم ئەتۆی مەردی نکاو.
من سەر و ژینم ئەتۆی، تیشکی هەتاو.
خونچەوو مێلاقی ئێمەن، لەکتریک
ڕێوو ڕەز ڕووناک و، شار و دێ بلوور
کۆشک و یانەی مەن، چیاوو کاو و تیک
گیاوگژ پەرداخ و، ڕەنگی سوور
لەم سەری دونیات لەگەڵ کەم، زیکە زیک
لەو سەرت پێ ڕاگەیێنم، باسی دوور
گەر بەرەو ڕووی دوژمنانیش بووی خەریک
من هەوا ئەگرم بە باڵندەی جەسوور
کشتوکاڵی ئارەزووت، گەر بوو فەریک
داسی باڵامت ئەبەخشم، بێ قسوور
کۆکەوە، بیکێشەوە، مەگرە شەریک
مەردبە، دانیشە، ببەستە سەر سنوور
هەر بخۆ، هەر بژیە، بێچوو بێنە ژوور
مێشک و دڵ پڕکە، لە زانین و لە نوور
هەر ئەتۆی بۆ من ژیانێکی تەواو
هەر ئەتۆی بۆ من دەوای جەرگی خوراو!