ئیرۆتیکا-حەمام

لەو دیو دیواری شووشەوە
لەبەر پرژەی بە خوڕڕەمی دووشەکەدای
سێبەرەکەت گەورەترە لە لەشی خۆت
سێبەرەکەت ئاوی لێ ئەچۆڕێتەوە
سێبەرەکەت کەف گرتوێتی
بە دەنگی بەرز بانگم ئەکەی
دەنگت تەڕە
هەڵمێ لە سێبەر هەڵئەسێ
لەو دیو شووشەی گرنجەوە
لەشت ڕێڕێ
لەشت لێڵە
من لێرەوە وا هەست ئەکەم ئاوێنەم و تەم ئەمگرێ
لەبەر پرژەی بە خوڕڕەمی دوشەکەدای
سێبەرەکەت دائەنەوێ
ئاو بێدەنگ بوو
ئێستە سێبەر ڕائەکات و
تۆیش بە ڕۆبێکی سوورەوە
دێیتە دەرێ
تۆ هێشتا لەناو کەفدا بووی
من چووبوومە ناو لۆکەوە و
لە جێگادا چاوەڕێت بووم!