ذکر کفایت شر مستهزان و رسیدن هم ایشان به خسران و زیان
از کتاب:
روضة الصفا
اثر:
میرزا عبدالقادر پاوه‌ای (1850-1910)
4 دقیقه
204 مشاهده
سا چوون «مصنف روضة الأحبابعربی»
وەی تەورە کەردەن نەقڵش جە کێتاب
پەنج نەفەر موشرێک غەلیز بەدخوو
مەلعوون کافەر گومڕای کینەجوو
حەزرەت، یا عەسرێ یا سەحەرگایێ
تەنها تەشریفش مەبەرد وە جایێ
هەر پەنج مەگێرتن سەرەڕای حەزرەت
مەکەردن دایم ئێستێهزای حەزرەت
نام ئەو پەنجە چوون خەمسەی فاسق
بەیان کەردەن چوون، حەکیم حازق
عاس بن وایل نەبیرەی غاسب
سانی ئەسوەد بێ «ابن المطلب»
سالیسەن ئەسوەد ئەولاد یەغووس
جە سلسلەی بەد قەوم دەقیانووس
چارومین حارس بن قەیس قەیرە
پەنجومین وەلید ئێبن موغەیرە
یەک ڕۆ جبرەئیل وە حوکم داوەر
ئاما وە خدمەت شای «خیر البشر»
جە فەزای کەعبە نیشتن وە دڵشاد
لوتف خوڎاوەند مەکەردن وە یاد
ناگا ئەو خەمسەی فاسق ویەردن
چەند جە ڕووی حەزرەت جەسارەت کەردن
جبرەئیل هەر یەک وە یەک ئەعزاشان
ئێشارەتش کەرد سەر تا وە پاشان
کەف پای عاس و دوو دیدەی ئەسوەد
فەرق ئەو ئەسوەد بن یەغووس بەد
ساق وەلید و بەتن حارس هەم
کەرد وە نیشانەی تیر ڕای عەدەم
بەڵێ ئەوەڵ عاس گومڕای بەد ئەندێش
سوار بی چەنی فەرزەندان وێش
جە مەککە خەیلێ دەورش وەردەوە
ئاخر جە ماڵێ پا ئاوەردەوە
خارێ شی وە کەف پەنجەی پاش وە دەو
ڕۆی ڕۆشن جە لاش سیا بی چوون شەو
هانا کەرد مارێ دا وە پامەوە
مەتلیا چەنی ئێش زامەوە
هەر چەند تەفەحوس کەردن پەرێ مار
نە مار نە عەقرەب هیچ نەبی دیار
ئەوەند ئاماس کەرد جە ئێش خەتەر
بی بە موازی لاشەی یەک بەقەر
مەوات پەیاپەی وە هەناسەی سەرد
خوڎای موحەممەد منش قەتڵ کەرد
هەر شەو تا سەحەر مەناڵا جە دەرد
تا ڕۆح وە مالێک دووزەخ تەسلیم کەرد
سانیەن ئەسوەد ئێبن موتەللێب
جە گۆشەی مەککە یەک ڕۆ موزتەرێب
جە سای درەختێ ئارەزووش خاو بی
ناغافڵ هەر دوو دیڎەش لێڵاو بی
جبرەئیل وە زۆر باڵ سەختەوە
فەرق ئەو مەڎا وە درەختەوە
مەناڵا و مەوات وە سەد داغ و دەرد
خوڎای موحەممەد قەتڵ منش کەرد
تا ئەجەڵ پەرێ ئەرواش بی نازڵ
وە نار دووزەخ دەردەم بی واسڵ
ئەویچ پەی دووزەخ ئەجەڵ هەم تل دا
شی وە شوون عاس ئێبن وایل دا
سێهوم بن یەغووس گومڕای کەم هونەر
جە مەککەی شەریف یەک ڕۆ شی وە بەر
شەرارەی سەبوون جە ناگا دا لێش
دەر دەم بێزار بی جە زێندەگی وێش
خەستە بی جە گیان چوون پێکیایی تیر
پۆست ئەندامش، سیا بی چوون قیر
خەیلێ جە وادی بێ هۆش بی خجڵ
موعاوێدەت کەرد جە نۆ پەی مەنزڵ
ئەهل و بەیت وێش نەشناساشان کەس
قاپی وان ئاما قوفڵ قاپیش بەست
هانا مەکەردش وێنەی لاڵ و لەنگ
پەی پەی جە غەرەز سەر مەڎا وە سەنگ
مەوات نە یەهوود نە هەم مەجووسم
بە خوڎا من ئەسوەد ئێبن یەغووسم
بی بە حەسرەت پێش ڕاگەی ئەندەروون
مەواتن «هذا رجل مجنونعربی»
خوەلاسەی کەلام تا ئاخر قەدەم
ڕۆح خەبیسش شی وە جەهەننەم
چارومین حارس گومڕای ئێبن قەیس
غەلیز ئەشرار تایفەی ئۆوەیس
یەک ماهی شوور تەناول کەردش
فەوری جە عەتەش کاری بی دەردش
هەر چەند نۆشا ئاو تەسکین نەڎا پێش
بەتنش فەراخ بی چوون بەتن گاومێش
مەناڵا جە دەرد مەواتش وەی تەور
خوڎای موحەممەد منش کوشت وە جەور
ئەوەند نۆشا ئاو پەیاپەی جەو دەم
بەتنش چوون سەراو تۆقیا وە هەم
ساتێ وە سەد نەوع فەریاد مەکەردش
ئەو هەم تا مەنزڵ وە دووزەخ بەردش
پەنجومین وەلید پەلید مەردار
ئێبن موغەیرە لەعین بەدکار
یەک ڕۆ وە خەیاڵ عەزم نیازێ
ڕاش کەوت وە دووکان یەک پەیکان سازێ
پەیکانێ چوون خار شی وە دامانش
ساقش کەرد وە زام تا ئوستخوانش
بەعزێ جە عەورەت نەو جا دیار بین
جەو زەخم پەیکان گشت خەبەردار بین
جە ڕووی تەکەببور هیچ نەکەرد ئەندێش
بەر ناوەرد پەیکان جە دامان وێش
تا یاوا مەنزڵ وە کام و ناکام
ساقش مەجرووح بی چەنی ئێش زام
وە فەریاد بەرز مەناڵا جە دەرد
خوڎای موحەممەد منش قەتڵ کەرد
تا ناگا قابێز قەبز ڕۆحش کەرد
ئەو هەم وە کوورەی دووزەخ تەشریف بەرد
هەر پەنج ئەبلە ڕەنج، وە بێ زیاد و کەم
وە نار دووزەخ واسڵ بین وە هەم