zikir kifayt şir mistihzan û risîdin him ayşan bih xisran û zyan
Li pirtûka:
Rewzetul Sefa
Berhema:
Mîrza Ebdilqadirê Paweyî (1850-1910)
4 Xulek
476 Dîtin
sa çûn «misinf ruzة al’eḧbabErebî»
wey tewre kerden neqiłş ce kêtab
penc nefer muşrêk ẍelîz bedxû
mel’ûn kafer gumřay kînecû
ḧezret, ya ’esrê ya seḧergayê
tenha teşrîfiş meberd we cayê
her penc megêrtin sereřay ḧezret
mekerdin daym êstêhzay ḧezret
nam ew pence çûn xemsey fasq
beyan kerden çûn, ḧekîm ḧazq
’as bin wayl nebîrey ẍasb
sanî eswed bê «abin alimtilb»
salîsen eswed ewlad yeẍûs
ce silsiley bed qewm deqyanûs
çarumîn ḧars bin qeys qeyre
pencumîn welîd êbin muẍeyre
yek řo cibre’îl we ḧukim dawer
ama we xidmet şay «xîr albişir»
ce fezay ke’be nîştin we diłşad
lutif xuđawend mekerdin we yad
naga ew xemsey fasq wiyerdin
çend ce řûy ḧezret cesaret kerdin
cibre’îl her yek we yek e’zaşan
êşaretiş kerd ser ta we paşan
kef pay ’as û dû dîdey eswed
ferq ew eswed bin yeẍûs bed
saq welîd û betin ḧars hem
kerd we nîşaney tîr řay ’edem
bełê eweł ’as gumřay bed endêş
swar bî çenî ferzendan wêş
ce mekke xeylê dewirş werdewe
axir ce małê pa awerdewe
xarê şî we kef pencey paş we dew
řoy řoşin ce laş sya bî çûn şew
hana kerd marê da we pamewe
metlya çenî êş zamewe
her çend tefeḧus kerdin perê mar
ne mar ne ’eqreb hîç nebî dyar
ewend amas kerd ce êş xeter
bî be mwazî laşey yek beqer
mewat peyapey we henasey serd
xuđay muḧemmed minş qetił kerd
her şew ta seḧer menała ce derd
ta řoḧ we malêk dûzex teslîm kerd
sanyen eswed êbin mutellêb
ce goşey mekke yek řo muzterêb
ce say dirextê arezûş xaw bî
naẍafił her dû dîđeş lêław bî
cibre’îl we zor bał sextewe
ferq ew međa we dirextewe
menała û mewat we sed daẍ û derd
xuđay muḧemmed qetił minş kerd
ta eceł perê erwaş bî naził
we nar dûzex derdem bî wasił
ewîç pey dûzex eceł hem til da
şî we şûn ’as êbin wayl da
sêhum bin yeẍûs gumřay kem huner
ce mekkey şerîf yek řo şî we ber
şerarey sebûn ce naga da lêş
der dem bêzar bî ce zêndegî wêş
xeste bî ce gyan çûn pêkyayî tîr
post endamş, sya bî çûn qîr
xeylê ce wadî bê hoş bî xicił
mu’awêdet kerd ce no pey menził
ehil û beyt wêş neşnasaşan kes
qapî wan ama qufił qapîş best
hana mekerdiş wêney lał û leng
pey pey ce ẍerez ser međa we seng
mewat ne yehûd ne hem mecûsim
be xuđa min eswed êbin yeẍûsim
bî be ḧesret pêş řagey enderûn
mewatin «hiza ricil micnunErebî»
xwelasey kelam ta axir qedem
řoḧ xebîsiş şî we cehennem
çarumîn ḧars gumřay êbin qeys
ẍelîz eşrar tayfey oweys
yek mahî şûr tenawil kerdiş
fewrî ce ’eteş karî bî derdiş
her çend noşa aw teskîn neđa pêş
betinş ferax bî çûn betin gawmêş
menała ce derd mewatiş wey tewr
xuđay muḧemmed minş kuşt we cewr
ewend noşa aw peyapey cew dem
betinş çûn seraw toqya we hem
satê we sed new’ feryad mekerdiş
ew hem ta menził we dûzex berdiş
pencumîn welîd pelîd merdar
êbin muẍeyre le’în bedkar
yek řo we xeyał ’ezim nyazê
řaş kewt we dûkan yek peykan sazê
peykanê çûn xar şî we damanş
saqiş kerd we zam ta ustixiwanş
be’zê ce ’ewret new ca dyar bîn
cew zexim peykan gişt xeberdar bîn
ce řûy tekebbur hîç nekerd endêş
ber nawerd peykan ce daman wêş
ta yawa menził we kam û nakam
saqiş mecrûḧ bî çenî êş zam
we feryad berz menała ce derd
xuđay muḧemmed minş qetił kerd
ta naga qabêz qebiz řoḧiş kerd
ew hem we kûrey dûzex teşrîf berd
her penc eble řenc, we bê zyad û kem
we nar dûzex wasił bîn we hem